2030-cu ilə qədər Türkiyə kömürdən istifadəni tamamilə dayandırmalıdır ki, bu da ölkənin ekoloji hədəflərinə mühüm töhfə verəcək.
“İki sahil” xəbər verir ki, bununla bağlı qardaş ölkənin 16 qeyri-hökumət təşkilatı (QHT) BMT-nin İqlim Dəyişikliyi üzrə Çərçivə Konvensiyasına Tərəflər Konfransının 29-cu sessiyası (COP29) fonunda Türkiyə hakimiyyət orqanlarına müraciət edib.
Ətraf mühitin mühafizəsi ilə bağlı QHT-lərin nümayəndələri Bakıda keçirilən COP29-da “ölkənin kömürdən istifadəsinin mərhələli şəkildə dayandırılması üçün aydın qrafikin” elanının vacibliyini vurğulayıblar.
Türkiyənin müxtəlif bölgələrindən olan iqlim fəalları “Kömürdən imtina edin, gələcəyi xilas edin!” başlıqlı bəyanatda qlobal ekoloji böhranla mübarizədə aydın addımların atılmasının vacibliyini qeyd ediblər.
“Sənaye inqilabının başlanğıcında dayanan Böyük Britaniya belə elektrik enerjisi istehsalında kömürdən istifadədən tamamilə imtina etdi. Dünyanın 50-dən çox ölkəsi artıq kömürdən imtina etmək üçün milli planlarını açıqlayıb, Türkiyə isə hələ də bu qazıntı yanacağının əhəmiyyətində israr edir. Ölkənin səlahiyyətli orqanları hər il kömür sənayesini dəstəkləmək üçün milyonlarla dollar ayırır ki, bu da dövlət büdcəsinə əlavə yük qoyur”, -deyən bəyanatın müəllifləri Türkiyənin 2025-ci il üçün kömürdən istifadəni mərhələli şəkildə dayandırmaq üçün aydın öhdəlik götürməsinin NDCs (Milli Müəyyən Edilmiş Töhfə) mətninə daxil edilməsinin zəruriliyinə işarə ediblər.
