Braziliya millisinin və "Əl-Hilal"ın forvardı Neymar karyerasını yenidən davam etdirmək istəyir.
Fanat.Az xəbər verir ki, məlumatı "Todofichajes" yayıb.
Mənbənin məlumatına görə, ulduz futbolçu vaxtilə çıxış etdiyi "Barselona"ya dönməyə yox, kataloniyalıların əzəli rəqibi "Real Madrid"ə keçməyə can atır. Paytaxt klubunun hücumçuları Vinicius Junior və Kylian Mbappe ilə əla münasibətdə olmasıyla yanaşı, "Real Madrid"in vaxtilə PSJ-də oynadığı dövrdə onu transfer etmək istəməsi vurğulanıb.
Klublararası dünya çempionatından sonra "Əl-Hilal"ı tərk etmək niyyətində olan braziliyalı karyerasını davam etdirmək üçün klub axtarır. Səudiyyə klubu Neymarı müqaviləsi başa çatdıqdan sonra buraxacaq. 32 yaşlı vingerə "İnter Mayami"dən rəsmi təklif olsa da, o, məhz "Real Madrid"ə keçmək arzusundadır.
Xatırladaq ki, Neymar 2023-cü ilin avqustunda PSJ-dən "Əl-Hilal"a keçib. Onun ərəblərlə müqaviləsinin müddəti 2025-ci ilin iyununda başa çatacaq.
Mirağa
