Türkiyənin qərb və mərkəzi bölgələrində dumanlı hava şəraiti ilə bağlı yayılan xəbərlər ictimaiyyətin diqqətini çəkib. Bildirilir ki, havanın çirklənməsi nəticəsində xlor qoxusunu xatırladan pis qoxu İstanbul, Ankara və İzmir kimi böyük şəhərlərdə hiss oluna bilər.
Musavat.com xəbər verir ki, bu barədə meteorologiya üzrə mütəxəssis Orxan Şən bəyan edib. Onun sözlərinə görə, bu fenomen fotokimyəvi dumanla əlaqəlidir ki, bu da əsasən nəqliyyat vasitələrindən yaranan azot dioksidin günəş işığı ilə reaksiyaya girməsi nəticəsində meydana gəlir.
Orxan Şən, havanın keyfiyyətinin pisləşməsi səbəbindən xüsusilə tənəffüs sistemi problemi olan insanlara N95 maskası taxmağı tövsiyə edib. Onun vurğuladığı kimi, bu vəziyyət ağciyərlərə ciddi zərər verə bilər.
Lakin Türkiyənin Ekologiya, Şəhərsalma və İqlim Dəyişiklikləri Nazirliyinin Meteorologiya Baş İdarəsi bu iddiaları təkzib edib. Nazirlik azot dioksidin pis qoxuya səbəb olacağı ilə bağlı hər hansı xəbərdarlıq edilmədiyini bəyan edib.
Bu hadisə hava çirkliliyi və ekoloji maarifləndirmə ilə bağlı cəmiyyətdə ciddi müzakirələrə səbəb olub.
Musavat.com
