“Liverpul”un yarımmüdafiəçisi Aleksis Makallister komanda yoldaşı, misirli hücumçu Məhəmməd Salahın İngiltrə klubunda qalmasını istəyir.
Arena.az xəbər verir ki, argentinalı futbolçu, misirli ulduzun klubla müqavilə müddətinin uzadılması ilə bağlı danışıqlarına münasibətini bildirib:
“Ümidvaram ki, o, gələn il də “Liverpul”da çıxışını davam etdirəcək. Mən danışıqların uğurla başa çatmasını istəyirəm. O, burada xoşbəxt görünür. O, klubun əfsanəsidir. Karyerasını burada bitirsəydi, mükəmməl olardı, amma bunlar çox şəxsi qərarlardır və bu, həm də klubun təhlil etməsindən və ya qərar verməsindən asılıdır”, deyə Makallister vurğulayıb.
Xatırladaq ki, Məhəmməd Salah 2017-ci ilin iyul ayından “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkmişdi.
Salah cari mövsümdə “qırmızılar”ın heyətində bütün yarışlarda 22 oyuna çıxıb. O, bu oyunlarda 16 qol vurub, 12 məhsuldar ötürmə verib.
Misirli hücumçunun “Liverpul”un heyətində ümumi statistikası isə belədir: 371 oyun, 227 qol, 100 məhsuldar ötürmə.
Salah “Liverpul”la bütün mümkün ali klub yarışlarının qalibi olub. O, “Liverpul” və “Roma”dan başqa, “Fiorentina”, “Çelsi”, “Bazel” və “Əl-Mukavilun” klublarında çıxış edib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib, 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli cinah hücumçusunun transfer dəyərini 55 milyon avro məbləğində qiymətləndirir.
