ABŞ Konqresinin Nümayəndələr Palatası 2025-ci il üçün müdafiə sahəsinə 884 milyard dollar ayırıb, lakin büdcədə Ukrayna üçün borc və yardım layihəsi qeydə alınmayıb.
Sfera.az xəbər verir ki, Ukraynanın ABŞ-dəki səfiri Oksana Markarovanın sözlərinə görə, əvvəlcə qanun layihəsində bu bənd var idi, lakin sonra onun üstündən xətt çəkilib. O əlavə edib ki, diplomatik missiya ikipartiyalı və ikipalatalı Ukrayna ilə bağlı qanun layihəsində əksini tapmış bu mexanizmin qorunmasına nail olmaq üçün çalışmağa davam edir.
Səfirin sözlərinə görə, qəbul edilmiş müdafiə büdcəsində Ukraynaya Təhlükəsizliyə Yardım Təşəbbüsü (USAI) üçün də vəsait nəzərdə tutulmayıb, çünki 300 milyon dollar həcmində bu cür maliyyə vəsaiti ötən ilin qanununa “əvvəlcədən” daxil edilib.
Ümumilikdə, 2025-ci il üçün NDAA-nı 281 konqresmen dəstəkləyib, 140 qanunverici isə əleyhinə səs verib: 16 Respublikaçı və 124 Demokrat. Senat gələn həftə sənədə baxacaq.
Qeyd edək ki, ABŞ-nin hazırkı prezidenti Co Bayden Kiyevə silah tədarükünün bürokratik prosedurunu sadələşdirmək üçün 2022-ci il mayın 9-da Ukrayna üçün Lend-Lease qanununu imzalayıb. Sonra sənədin müddəti uzadılıb. Əvvəllər belə bir proqram yalnız İkinci Dünya Müharibəsi zamanı mövcud idi. O zaman Amerika hərbi yardımı faşist Almaniyasının əleyhdarlarına, ilk növbədə Böyük Britaniya və SSRİ-yə ilkin ödənişsiz və uzun müddət təxirə salınmış ödənişlə verilirdi.
Pentaqonun dekabrın 2-də verdiyi məlumata görə, Rusiya işğalı başlayandan bəri Amerikanın Ukraynaya hərbi yardımının ümumi məbləği 61,4 milyard dollar təşkil edib. Departament beş gün sonra Ukrayna Silahlı Qüvvələri üçün təxminən 1 milyard dollarlıq yeni tranş elan edib. Həmçinin dekabrın 10-da ABŞ Kiyevə 20 milyard dollar kredit ayırıb və bu kredit Rusiyanın dondurulmuş aktivləri hesabına ödəniləcək.
Bu arada, Ukrayna 2025-ci ildə müharibəni davam etdirmək üçün Qərbdən 126 milyard dollar alacağını gözləyir. Bu məbləğ 9-11 iyulda NATO-nun Vaşinqtonda keçirilən sammitində Qərb ölkələrinin razılaşdığı məbləğdən xeyli çoxdur. Sonra isə blok 2025-ci ildə 43,3 milyard dollar məbləğində “minimum əsas maliyyələşdirmə” barədə razılığa gəlib.
Firuzə Əliyeva
Sfera.az
