“Mançester Siti”nin müdafiəçisi Ruben Dias Çempionlar Liqasının Liqa mərhələsində (6-cı tur) “Yuventus”a qarşı keçirdikləri oyunu şərh edib.
Arena.az xatırladır ki, uğursuz mövsüm keçirən Xosep Qvardiolanın komandası İtaliya klubu ilə səfər oyunundan 0:2 hesablı məğlubiyyətlə ayrılıb.
Ruben Dias matçdan sonra jurnalistlərə açıqlamasında bunları söyləyib:
“Onlar iki qol vurdular, biz isə birinə də vurmadıq. Fursətlərimiz oldu, amma onları qola çevirə bilmədik. Mahiyyətcə, qələbə qazanmadığınız zaman, bu, kifayət qədər yaxşı olmadığınızdan irəli gəlir”.
“Mançester Siti”nin türkəsilli almaniyalı yarımmüdafiəçisi İlkay Gündoğan da “Yuventus”a səfər məğlubiyyətdən sonra komandasının oyunundan narazılığını ifadə edib:
“Bu, çox məyusedicidir. Amma hazırda biz davamlı olaraq yanlış qərarlar veririk”, deyə Gündoğan ümumi uğursuzluqlar mənzərəsinə eyham vurub.
“Mançester Yunayted”in ingilis keçmiş müdafiəçisi, hazırda isə futbol mütəxəssisi çalışan Rio Ferdinand da “Mançester Siti”nin son uğursuz nəticələri barədə danışıb. İngilis təhlilçinin bu barədə fikrini təqdim edirik:
“Onlar ardıcıl dörd dəfə İngiltərə Premyer Liqasının qalibi olmuş nəhəng komandadır. Onların böyük uğur hekayəsi var. Amma biz “Pep” Qvardiolanın komandasının bu qədər pis göründüyünə heç şahidlik etməmişdik. Məşqçi bu komandanı gücləndirmək və onlara idman formasını və özünəinamı bərpa etmək üçün bir yol arayıb tapmalıdır”, deyə Ferdinand vurğulayıb.
Rio Ferdinand keçmiş klubu “Mançester Yunayted” barədə də danışıb. O, bu vəzifəyə təyin edildikdən 5 ay sonra idman direktoru Den Eşuortun klubu tərk etməsi xəbərinə münasibətini açıqlayıb:
“Ümidvaram ki, onlar orada olan sərsəm oyunçulara qarşı da amansız olacaqlar”, deyə Ferdinand gərəksiz oyunçuların “qırmızı şeytanlar”ın düşərgəsindən kənarlaşdırılmasını istədiyini açıqlayıb.
