Türkiyə Radio Televiziya Qurumunun (TRT) təşkilatçılığı ilə keçirilən 15-ci Beynəlxalq Sənədli Film Mükafatlarının açılış mərasimi İstanbulda keçirilib. Festival bu il “Uzaq olsa da əslində çox yaxın” şüarı ilə Qəzzada baş verən insanlıq faciəsinə diqqət çəkən güclü mesajlarla tamaşaçılara qapılarını açıb.
Festivalın ilk günündə keçirilən “İnsanlıq çağırışı” panelində Qəzzadaki zülmə qarşı dünyanın və sənətçilərin münasibəti müzakirə edilib. İncəsənət dünyasından çoxsaylı qonaqlar açılış tədbirində bir araya gəlib. Açılış mərasiminin xüsusi qonaqlarından biri “Game of Thrones” serialında Davos Sivors obrazı ilə tanınan aktyor Liam Kanninqham TRT-yə açıqlama verib. İrlandiyalı aktyor Liam Kanninqham bildirib: “Belə prestijli bir təşkilatda olmaqdan qürur duyuram. Bu gün Fələstində baş verən zülmü müzakirə edirik. Dünyada artıq danışmaq vaxtı deyil, hərəkət etməyin vaxtıdır. Həyatda karyeradan daha önəmli şeylər var. Hər hansı bir cəmiyyət soyqırıma məruz qaldıqda, bu, bütün insanlıq üçün böyük bir məyusluqdur.”
Festivalda finala çıxan filmlərlə yanaşı, xüsusi seçilmiş sənədli filmlər də tamaşaçılara təqdim olunacaq.
Dörd müsabiqə kateqoriyasında 100 ölkədən 1700-ə yaxın müraciətin olduğu festivalda 40 finalçı mükafat uğrunda yarışacaq. 15 dekabrda keçiriləcək mükafatlandırma mərasimində “TRT 60-cı İl Xüsusi Mükafatları” daxil olmaqla ümumilikdə 15 mükafat sahiblərinə təqdim ediləcək.
Tədbirin bağlanış və mükafatlandırma mərasimi 15 dekabr bazar günü Türkiyə saatı ilə 20:00-da "TRT Belgesel" kanalında canlı yayımlanacaq.
Festival təqvimi və müsabiqə haqqında ətraflı məlumatı “www.trtbelgesel.com” ünvanından əldə etmək olar.
