ADA Universiteti, ADA Universiteti Fondu (ADAF) və “PAŞA Bank” qadınların peşəkar inkişafını dəstəkləmək, onlara müasir əmək bazarının tələblərinə uyğun bacarıqlar qazandırmaq üçün yeni sosial layihəyə start verir. Layihənin hədəf kütləsi müxtəlif sahələrdə biznes fəaliyyəti ilə məşğul olan sahibkar qadınlardır.
Bu barədə TƏHSİL.BİZ -ə ADA Universitetindən məlumat verilib.
Qadınların sosial həyatdakı önəmini, biznes mühitinin inkişafına təsirini nəzərə alaraq irəli sürülən bu layihə onları müsbət istiqamətdə dəyişməyə, tərəqqiyə təşviq edir. Həmçinin qadınları cəmiyyətin inkişafına fayda verən aparıcı qüvvələrə çevrilməyə, yalnız özləri üçün deyil, digərləri üçün də faydalı olmağa ruhlandırır.
Bu məqsədlərə nail olmaq üçün layihə çərçivəsində müxtəlif mövzularda sessiyalar təşkil ediləcək. Belə ki, maliyyə, liderlik, kommunikasiya, sahibkarlıq və digər mövzularda bilik və bacarıqların artırılması üçün Milli Məclisin deputatlarının, eləcə də korporativ sektordan olan peşəkarların iştirakı ilə interaktiv təlimlər keçiriləcək. Bununla yanaşı, qadınların yaradıcı qabiliyyətlərinin, mənəvi keyfiyyətlərinin aşkarlanmasına dəstək olacaq incəsənət və yoqa dərsləri də reallaşacaq.
ADA Universiteti Fondunun Sponsorluq layihələri şöbəsinin direktoru Firuzə İsmayıl Əliyeva bildirib: “Daimi tərəfdaşlarımızla birgə ötən ildən etibarən üzərində işlədiyimiz bu layihə qadınların sosial və peşəkar mühitdə rolunu gücləndirməyi və onları öz səriştələri ilə cəmiyyətə əlavə dəyər gətirən şəxslərə çevirməyi hədəfləyir”.
