FIDE dekabrın 26-31-də Nyu-Yorkda keçiriləcək rapid və blits üzrə dünya çempionatında iştirakçıların tam siyahısını açıqlayıb.
İdman.biz xəbər verir ki, kişilərin yarışında 180, qadınların mübarizəsində 109 şahmatçı çıxış edəcək.
Azərbaycan mundiala 15 zəka sahibi ilə qatılacaq. ABŞ-də Şəhriyar Məmmədyarov, Eltac Səfərli, Aydın Süleymanlı, Vasif Durarbəyli, Məhəmməd Muradlı, Vüqar Rəsulov, Riad Səmədov, Vüqar Manafov, Günay Məmmədzadə, Gülnar Məmmədova, Xanım Balacayeva, Ülviyyə Fətəliyeva, Gövhər Beydullayeva, Zeynəb və Türkan Məmmədyarovalar çıxış edəcəklər.
Dünya çempionatına reytinqinə görə Maqnus Karlsen (Norveç) başçılıq edəcək, həmçinin ilk "üçlük"də Fabiano Karuana (ABŞ) və Maksim Vaşye-Laqrav (Fransa) yer alır.
Qadınların siyahısında isə çinlilər Yu Vençjun, Ley Tinqje və Tan Jonqyi liderdirlər.
İdman.biz
