Türkiyə Radio Televiziya Qurumu (TRT) xarici dillərdəki yayımlarına bir yenisini əlavə etdi. “TRT Farsça” rəqəmsal xəbər platformasının təqdimat mərasimi paytaxt Ankarada keçirildi. Təqdimat proqramında çıxış edən Prezident Administrasiyası İctimaiyyətlə Əlaqələr Departamentinin direktoru Fəxrəddin Altun TRT-nin platformalarının uğurlarına diqqət çəkdi. O, “TRT Farsça”nın həqiqət mübarizəsinin bir məhsulu olduğunu vurğulayaraq “Bugünkü vəziyyətə baxdığımızda TRT-nin rəqəmsal platformalarının milyonlarla izləyiciyə çatdığını bilirik” dedi.
TRT-nin icraçı direktoru Mehmet Zahid Sobacı isə çıxışında “TRT Farsça vasitəsilə İran, Əfqanıstan və Tacikistanı əhatə edən, 130 milyondan çox farsca danışan insanın yaşadığı geniş bir coğrafiyaya səslənərək bu regionla ortaq mədəni münasibətlərimizi gücləndirməyi hədəfləyirik. Regionla turizm, mədəniyyət, ticarət və təhsil sahələrində əlaqələrimizə töhfə verməyi planlaşdırırıq. Türklər və farsca danışılan coğrafiyaların xalqları bir-birilərini daha yaxşı tanımaq üçün etibarlı media mənbələrindən yararlanmalıdırlar” ifadələrini işlədib.
TRT-nin ictimai yayım orqanı olaraq Türkiyənin beynəlxalq səhnədəki roluna uyğun hərəkət etdiyini bildirən Sobacı “Cənab prezidentimiz Rəcəb Tayyib Ərdoğan liderliyində Türkiyə hər zaman haqlının haqqını qoruyan mövqeyi ilə məzlumlara ümid olur. Ölkəmiz qlobal və regional böhranların dərinləşməsinin qarşısını almaq məqsədilə aktiv siyasət aparır və dialoqun, sülhün ünvanı olaraq ön plana çıxır” dedi.
TRT-nin icraçı direktoru Qərb mediasına da etibarlılıq mövzusunda tənqidlər səsləndirərək “Qərb mediasına qarşı etimad böhranının yaşandığı bir dövrdə onların görməzdən gəldiyi mövzuları dünyanın gündəminə gətiririk. Xəbərçilik sahəsində milyardlarla insana ədaləti və haqqı əsas götürən bir alternativ təqdim etməyin mübarizəsini aparırıq” ifadələrini işlətdi.
Mərasim zamanı “TRT Farsça”nın beynəlxalq rəqəmsal xəbər platformasında ilk xəbər sayta yükləndi. Təqdimat mərasiminə beynəlxalq missiya rəhbərləri və media sektorunun nümayəndələri böyük maraq göstərdi. Tədbirdə Sedat Anar trio qrupunun müşayiəti ilə qonaqlara musiqi ziyafəti təqdim edildi.
