Futzal üzrə Azərbaycan milli komandasının üzvü Ülvi Əliyev ötən gün İsveç yığmasına qarşı keçirdikləri oyunu şərh edib.
Arena.az xəbər verir ki, Avropa çempionatının (AÇ-2026) əsas seçmə mərhələsi çərçivəsində ilk oyununu keçirən Azərbaycan millisi İsveç yığması ilə məhsuldar heç-heçəyə razılaşıb – 3:3.
Oyundan sonra Ülvi Əliyev Azərbaycan Futzal Federasiyasının rəsmi saytına açıqlamasında bunları deyib:
“İsveçlə oyunda bizə inanan və dəstəkləyən azarkeşlərə təşəkkür edirəm. Zalda gözəl atmosfer yaratmışdılar, gücümüzə güc qatdılar. Oyuna gəldikdə, meydana çıxan hər birimiz əlimizdən gələni etdik ki, seçmə mərhələyə qələbə ilə başlayaq. İki dəfə hesabda önə keçsək də, diqqətsizlikdən qollar buraxdıq və məğlub duruma düşdük. Ancaq son saniyəyə qədər oyun ritmini saxladıq, intizamı qoruduq, inandıq, mübarizə apardıq, xarakter göstərdik və bunun nəticəsi olaraq final fitinə 2 saniyə qalmış bərabərlik qolunu vurduq. Yenə deyirəm, qələbə qazanmaq üçün mübarizə apardıq. Oyunun gedişi də göstərdi ki, xüsusilə də ikinci hissədə daha çox qol epizodu yaratdıq. Təəssüf ki, epizodları realizə edə bilmədik. Halbuki qələbə layiq idik. Məncə, başlanğıc üçün 1 xal da pis nəticə deyil.
Hazırda milli komanda yenidən formalaşdırılır. Buna baxmayaraq, qarşımıza mümkün qədər çox xal toplamaq və üst sıralarda qərarlaşmaq tapşırığı qoyulub. Baş məşqçimiz Vitali Borisov da nələrə diqqət etməli olduğumuzu hər zaman başa salır. Ümid edirəm ki, yekunda istəyimizə çatacağıq”.
