Ukrayna Prezidenti Vladimir Zelenski sosial media hesabında paylaşdığı bir videoda rus əsgərlərinin cəbhə xəttində həlak olan Şimali Koreya əsgərlərinin üzlərini yandıraraq onları tanınmaz hala saldıqlarını iddia edib.
KONKRET.az xarici mediaya istinadən xəbər verir ki, Zelenski həm ölən, həm də yaralanan Şimali Koreya əsgərlərinə dair sübutların mövcud olduğunu bildirib. ABŞ rəsmiləri də bu məlumatı təsdiqləyən açıqlamalar yayıb.
Buna qarşılıq olaraq sosial mediada paylaşılan videoda Ukrayna Xüsusi Təyinatlı Qüvvələrinin dronlardan istifadə edərək rus əsgərlərinə hücum təşkil etdiyi görünür. Maraqlısı budur ki, bu dronlar şimal maralı, pinqvinlər və digər Milad temalı oyuncaqlarla bəzədilib. Kadrlarda bu dronların döyüş meydanı üzərində hərəkət edərək əsgərlərə yaxınlaşması və onların qorxu içində qaçmağa çalışması təsvir edilib.
Milad oyuncaqları ilə təchiz edilmiş bu dronlar həm psixoloji təsir göstərir, həm də ölümcül hücumlar həyata keçirir. Videoda pilotsuz təyyarələrin əsgərlərə tərəf sürətlə endiyi və ciddi zərər yetirdiyi açıq şəkildə görünür.
Hadisə ilə bağlı hələlik Rusiya tərəfindən rəsmi açıqlama verilməyib./Milli.Az
