“Suriyada baş verən hadisələr hər hansı bir planın nəticəsi deyil, ortaq düşüncənin məhsuludur”.
Hurriyyet.az xəbər verir ki, bu sözləri globalinfo.az-a türkiyəli siyasi şərhçi Camal Zehir Suriyada baş verən hadisələr və Türkiyənin prosesə baxışını şərh edərkən deyib.
O bildirib ki, qəddar, zalım Əsəd rejimi Suriya xalqına qarşı soyqırımı törədib:
“Bu soyqırımı təkcə ərəblərə yox, kürd və türkmənlərə qarşı da həyata keçirilib.
Bu gün “Türkiyənin Suriyada nə işi var”, ya da “niyə bu ölkə ilə yaxından maraqlanır” deyənlər var. Türklər 1076-cı ildən 1918-ci ilə qədər Suriyada hakim güc olublar. Bu görə də Ankara suriyalıları öz xalqı kimi görür.
Camal Zehir
Türkiyə heç bir halda haqsızlığa göz yuma bilməz. Sərhədlərini açıb 6 milyona yaxın suriyalını həm ölkədə qonaq edib, həm də 5 milyona yaxın suriyalının sərhəd ərazilərdə təhlükəsizliyini təmin edib. Tarixi bağlar, eləcə də 6 milyona yaxın suriyalının Türkiyədə olmasına görə bu gün Ankara bu ölkə ilə yaxından maraqlanır”.
Politoloq qeyd edib ki, bu gün Türkiyə sevdalıları Suriyada hakimiyyətə gəlib:
“Türkiyə Prezidenti Rəcəb Tayyib Ərdoğan, MHP sədri Dövlət Baxçalı, Böyük Birlik Partiyasının başqanı Mustafa Desticinin dəstəyi ilə bu gün Suriyada ədalətin təmin olunduğunun şahidi oluruq”.
