Avrozonada İstehlak Qiymətləri İndeksi (İQİ) noyabr ayında illik bazda 2,2 faiz artıb.
“Cebheinfo.az” xəbər verir ki, Avropa Statistika İdarəsi (Eurostat) avrozona və Avropa İttifaqının (Aİ) noyabr ayı üzrə yekun inflyasiya məlumatlarını dərc edib. Məlumata görə, avrozonada oktyabrda 2 faiz olan illik inflyasiya noyabrda 2,2 faizə yüksəlib.
Noyabr ayında İQİ aylıq bazda mənfi 0,3 faiz təşkil edib. Bazar gözləntiləri noyabrda avrozonada illik inflyasiyanın 2,3 faiz, aylıq inflyasiyanın isə mənfi 0,3 faiz olacağı idi. Noyabrda avrozonada baza inflyasiyası illik 2,7 faiz, aylıq mənfi 0,6 faiz səviyyəsində ölçülüb. Beləliklə, avrozonada inflyasiya səviyyəsi noyabrda Avropa Mərkəzi Bankının (AMB) 2 faizlik hədəfini keçib.
Avrozonada inflyasiyanın əsas komponentlərinə baxdığımızda illik ən yüksək inflyasiya 1,74 faiz ilə xidmətlər sektorunda olub.
Xidmətləri 0,53 faizlə qida, alkoqol və tütün məmulatları, 0,17 faizlə qeyri-enerji sənayesi məhsulları izləyib. Enerji məhsullarında inflyasiya mənfi 0,19 faiz təşkil edib. Aİ-də oktyabrda 2,3 faiz olan illik inflyasiya noyabrda 2,5 faizə yüksəlib. Aİ-də İQİ noyabr ayında aylıq bazda mənfi 0,2 faiz olaraq təyin olunub.
Aİ-yə uyğun məlumatlara görə, noyabr ayında illik inflyasiya ən yüksək olan ölkələr 5,4 faiz ilə Rumıniya, 4,8 faiz ilə Belçika və 4 faizlə Xorvatiya olub. Noyabrda illik inflyasiya Almaniya və İspaniyada 2,4 faiz, Fransada 1,7, İtaliyada isə 1,5 faiz səviyyəsində müəyyən edilib.
