"Bu ilin ən mühüm nailiyyəti Azərbaycanın Avropa və dünya bodibildinqində əsas rəqib kimi qəbul edilməsidir".
Bunu mövsümə yekun vuran milli federasiyanın prezidenti Rauf Bünyatəliyev deyib.
İdman.biz xəbər verir ki, ilin sonunda komanda Avropa çempionatı və Dünya kubokunda ümumilikdə 30 mükafat qazanıb.
"Rəqiblər üçün Azərbaycan komandası keyfiyyət göstəricisidir, idmançılarımızdan çəkinirlər. Bu, böyük nailiyyətdir və eyni zamanda, ölkə bayrağı altında səhnəyə çıxan idmançılara əlavə güc verir. Üstəlik qadın idmançılarımız da yetişir. Məsələn, fitnes bikini yarışında Nərmin Tarıverdi Dünya kubokunun finalına çıxaraq 5-ci yeri tutub", - deyə Bünyatəliyev vurğulayıb.
O, həmçinin qeyd edib ki, respublika yarışlarında da idmançılar dünya səviyyəli çıxış nümayiş etdirirlər.
"Milli çempionatda ilk üçlükdə yer alan istənilən idmançı beynəlxalq arenada zirvədə olacaq. Hətta beynəlxalq federasiyanın prezidenti Rafael Santonxa Dünya kubokunun mükafatlandırma mərasimində Azərbaycanın bodibildinq ulduzları buraxan fabrik olmasını vurğulayıb. Bu bizim üçün dəyərlidir və gələcək vəzifəmiz bu keyfiyyət nişanını saxlamaq və nailiyyətləri artırmaqdır", - deyə Bünyatəliyev bildirib.
Qeyd edək ki, Santa Susannada (İspaniya) keçirilən qitə çempionatında idmançılarımız dördü mütləq titul olmaqla, ümumilikdə 8 qızıl, 6 gümüş, 6 bürünc medal qazanıblar. Bundan əlavə, kollektiv ümumi komanda hesabında birinci yeri tutub. Ümumilikdə mütləq kateqoriyada qalib gələn dörd idmançının hamısı beynəlxalq arenada debütant olublar. Bunlar Pərviz Qasımov (bodibildinq), Rauf Əliyev ("Muscular Men's Physique"), Fariz Nəcəfli ("Men's Physique") və yeniyemələrdə Aşur Abdullayevdir ("Men's Physique").
Santa Susannadakı Dünya kubokunda 4 qızıl, 2 gümüş və 4 bürünc, həmçinin iki mütləq titul qazanılıb. Mütləq kateqoriyasında qaliblər Elnur Allahyarlı (bodibildinq) və Fariz Nəcəfli ("Men's Physique") olublar. Samir Məmmədli (bodibildinq) və yeniyetmələrin yarışında Aşur Abdullayev ("Men's Physique") də İspaniyada qələbə qazanıblar.
İlin yekunlarına əsasən, Azərbaycan bodibilderləri altısı mütləq titul olmaqla, 12 qızıl, 8 gümüş və 10 bürünc medal qazanıblar.
İdman.biz
