“Barselona”nın 17 yaşlı ispaniyalı cinah hücumçusu Lamin Yamal uşaqlıqda hansı futbolçuları izləməyi xoşladığını açıqlayıb.
Arena.az xəbər verir ki, o, “blauqrana”nın argentinalı keçmiş hücumçusu, hazırda “İnter Mayami”də çıxış edən Lionel Messi ilə müqayisə edilməsinə də münasibət bildirib:
“Lionel Messi ilə müqayisə edilmək mənim üçün böyük şərəfdir. Amma mən öz hekayəmi yazmağa çalışıram. Messi tarixin ən yaxşısıdır, mən isə ilk addımlarımı hələ indicə atıram. Bəzən bu müqayisələr kömək etmirlər.
“Messidən başqa Neymar və Ronaldinyo da kumirlərim arasındadır. Əsasən onların şən üslubu və oyundakı simasına görə”, deyə Yamal vurğulayıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 21 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 71 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 9 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 150 milyon avro məbləğində qiymətləndirir.
