Supermarketdən alınmış qeyri-adi yumurta yalnız sahibinə deyil, həm də xeyriyyə təşkilatına böyük uğur qazandırıb.
“İki sahil” xəbər verir ki, "Daily Mail"in məlumatına görə, Lamborn şəhər sakini Ed Paunell nadir dəyirmi formalı toyuq yumurtasına sahib olub. Bu yumurta, yaranma ehtimalı milyardda bir olan unikal forma ilə diqqət çəkib.
Ed Paunell yumurtanı gənclərin psixi sağlamlığını dəstəkləyən "Iuventas Fondu"na ianə edib. Əvvəlcə fondda bunu zarafat kimi qəbul etsələr də, yumurtanı hərraca çıxarmaq qərarına gəliblər.
Nəticə hər kəsi təəccübləndirib: bu unikal yumurta hərracda 200 funt sterlinqə (430 manat) satılıb. Hərrac ümumilikdə 5000 funt sterlinq vəsait toplayaraq fondun psixi sağlamlıq problemləri ilə üzləşən 13-25 yaşlı gənclərə dəstək göstərməsinə kömək edib.
Fond əməkdaşı Rozz Repp bildirib: "Toplanmış vəsait gənclərin psixi sağlamlıq ehtiyaclarını qarşılayacaq".
