Böyük Britaniya Ukraynaya əlavə olaraq 225 milyon funt-sterlinq (286 milyon ABŞ dolları) məbləğində yeni hərbi yardım paketini açıqlayıb.
APA-nın xəbərinə görə, bu barədə məlumatı “Reuters” yayıb.
Bildirilib ki, bu məbləğin 92 milyon funt-sterlinqi ölkənin Hərbi Dəniz Qüvvələrinin hərbi-texniki təchizatı və pilotsuz uçuş aparatlarının tədarükünə yönləndiriləcək. Bununla yanaşı, 68 milyon funt-sterlinq dəyərində hava hücumundan müdafiə sistemləri alınacaq.
Hökumət ümumilikdə 65 milyon funt-sterlinq həcmindəki vəsaiti Ukrayna ordusunun texniki təchizatına dəstək məqsədilə ehtiyat hissələrinin, habelə 1000 ədəd radioelektron mübarizə sistemlərinin əldə olunmasına yönəldəcək.
Krallığın Nazirlər Kabinetindən o da bildirilib ki, ordunun hərbi hazırlığına dəstək davam etdiriləcək.
