Heydər Əliyev adına İdman-Konsert Kompleksində Azərbaycan Dillər Universitetinin (ADU) Konfutsi İnstitutu və Azərbaycanda Çinli Tələbələr Assosiasiyasının birgə təşkilatçılığı ilə stolüstü tennis üzrə “Konfutsi İnstitutu Kuboku” üçüncü dostluq turniri keçirilib.
Bu barədə TƏHSİL.BİZ -ə Konfutsi İnstitutundan məlumat verilib. Tədbirdə 50-dən çox çinli tələbə, Çin şirkətlərinin Azərbaycandakı əməkdaşları və Konfutsi İnstitutunun müəllimləri iştirak ediblər.
Yarış zamanı aparıcı oyunçular öz bacarıqlarını və özünəməxsus üslublarını nümayiş etdirməklə yanaşı, çoxsaylı tamaşaçılar arasından digər oyunçular üçün də məşqçi kimi çıxış ediblər.
Gərgin rəqabətin bir çox raundlarından sonra Fan Çonde və Çan Xao kişilər arasında, Lu Li və Li Jihua isə qadınlar arasında təkbətək turnirin qalibi elan edilib. Onlara xüsusi medal və sertifikatlar verilib.
Turnirin bütün iştirakçılarına, həmçinin Bakıda məşhur Çin aşpazı Ji Vanfen tərəfindən hazırlanmış soya paxlasından hazırlanan ənənəvi Çin yeməyi olan “tofu” təqdim olunub.
Konfutsi İnstitutunun direktoru Rafiq Abbasovun qeyd etdiyi kimi, turnir Çinin ənənəvi “Dunçji” bayramı – Qış Gündönümü Gününə təsadüf edib. Bu bayramda Çin kənd təsərrüfatı təqviminin 22-ci mövsümü başlayır və Pekinin Səma Məbədində əcdadlara ibadətlə bağlı rituallar keçirilir.
