Aktauda qəzaya uğrayan AZAL-a məxsus sərnişin təyyarəsində olan ekipaj üzvü Zülfüqar Əsədov hadisənin baş vermə anından danışıb.
APA-nın məlumatına görə, hazırda xəstəxanada olan Z.Əsədov 1988-ci ildən bəri təyyarə bələdçisi olaraq çalışdığını bildirib.
O qeyd edib ki, təyyarə eniş edən zaman havada qatı duman olub: “Pilot gördü ki, eniş etmək üçün yer görünmür. Buna görə də yenidən havaya qalxdı. Havada dövr etdikdən sonra yenidən enişə cəhd etdi, amma alınmadı. Bundan sonra o, məcbur olub havaya qalxdı və başqa istiqamətə yol aldı. Biz geriyə qayıdan zaman çöl hissədən qəribə, zərbəyəbənzər səs gəldi. Mən və Aydan xanım tez salona çıxdıq, insanları sakitləşdirməyə çalışdıq. Mən qabağa getmək istəyəndə qolumdan zərbə dəydi. Elə bil kimsə balta ilə qolumdan vurmuşdu. Qolumda dərin kəsik var idi. Daha sonra isə üçüncü zərbə səsi eşidildi. Biz insanlara təlimat verdik ki, suya eniş edəcəyik və hazır olsunlar, jiletlərini geyinsinlər”.
Zülfüqar Əsədovun sözlərinə görə, daha sonra ekipaj komandiri zəng edərək onlara deyib ki, sərnişinlərə suya yox, quruya eniş edəcəkləri barədə təlimat versinlər: “Fikrimcə, suya eniş etsəydik, sağ qalan olmayacaqdı. Çünki bizim təyyarənin mühərrikinə təsir göstərilmişdi və o suya sərt eniş etsəydi, bu daşa dəyməkdən də möhkəm olacaqdı. Nəticədə təyyarə parça-parça olacaqdı. Biz məlumatı eşidib sərnişinləri təlimatlandırıq. Bütün sərnişinlər təlimata uyğun hərəkət etdi.
Pilotlar çox çalışdılar ki, təyyarəni havada saxlayıb təyinat nöqtəsinə qədər enişi edə bilsinlər. Onlar bunun üçün çox cəhd etdilər. İlk olaraq da yerə ön təkərləri vurdular. Çünki bütöv şəkildə yerə dəysə idi, oradan sağ çıxan insan olmayacaqdı. Ya ön təkəri seçməli idilər, ya da arxa”.
Təyyarə bələdçisi bildirib ki, qəzadan sonra sərnişinlərə kəmərlərini açaraq çölə çıxmaq təlimatını veriblər: “Təyyarə yerə dəyəndən sonra ön hissəsi ayrıldı. Arxa hissəsi də sürətlə bir qədər getdikdən sonra dayandı və yanıüstə çöndü. Camaat başıaşağı qalmışdı. Mənim huşum özümdə idi. Qan itkisi olsa da, çalışırdım özümü saxlayım ki, nəyəsə kömək lazım olduqda edim. İçəridə hava sıxlığı var idi və mən qapını açdım ki, içəri hava gəlsin. Aydan xanımla birlikdə kəmərlərimizi açdıq. Sərnişinlərə də bildirdik ki, hamı kəmərini açıb çıxsın”.
Ətraflı videomaterialda:
