Hörmətli Mehriban xanım!
Sizi qarşıdan gələn Dünya Azərbaycanlılarının Həmrəylik Günü və Yeni il münasibətilə səmimi qəlbdən təbrik edirəm.
Sizin Dünya Azərbaycanlılarının həmrəyliyinin və milli birliyimizin qorunmasında və möhkəmlənməsində böyük əməyiniz danılmazdır. Möhtərəm cənab prezident İlham Əliyevin ən sadiq silahdaşı kimi Azərbaycanın çiçəklənməsi, onun dünya miqyasında nüfuzunun artması naminə gərgin işiniz, Vətənə, xalqa sədaqətiniz Sizə xalqımız arasında böyük rəğbət, sevgi doğurmuşdur. Birinci vitse-prezident kimi genişmiqyaslı və yorulmaz fəaliyyətiniz Azərbaycan dövlətçiliyinə əhəmiyyətli töhvələr verməkdədir.
Hörmətli Mehriban xanım!
44 günlük Vətən müharibəsinin həyacanlı və gərgin anlarında olduğu kimi, ondan keçən zaman kəsiyində də Müzəffər Ali Baş Komandan, ölkə prezidenti cənab İlham Əliyevlə birlikdə işğaldan azad edilən torpaqlarımıza çoxsaylı səfərləriniz, aparılan quruculuq və bərpa işlərində, təməl qoyma prosesində fəal iştirak etməyiniz, prezidentimiz, əqidə və həyat yoldaşınızla birgə addımlayaraq yeni-yeni uğurlara imza atmağınız Sizə ölkəmizdə və ölkəmizdən kənarda böyük nüfuz qazandırmışdır.
Sizin xeyirxah əməlləriniz davam edir. Şəhid ailələrinə, qəhrəman qazilərimizə, Vətən müharibəsi iştirakçılarına göstərdiyiniz qayğı və diqqət cəmiyyətimizdə yüksək qiymətləndirilir, Sizə olan rəğbəti daha da artırır.
Sizi bir daha Dünya Azərbaycanlılarının Həmrəylik Günü və Yeni il münasibətilə ürəkdən təbrik edir, Sizə, ömür-gün yoldaşınız cənab prezidentimizə, övladlarınıza və nəvələrinizə möhkəm can sağlığı, ailə xoşbəxtliyi, çoxşaxəli fəaliyyətinizdə yeni-yeni uğurlar diləyirəm.
Dərin hörmət və ehtiramla,
Fəzail Ağamalı
“Ana Vətən” Partiyasının sədri
