ABŞ Hərbi Apellyasiya Məhkəməsi, Pentaqon rəhbəri Lloyd Ostinin 11 sentyabr 2001-ci il terror aktlarının təşkilatçıları ilə bağlanmış öncədən razılaşdırılmış müqaviləni ləğv etmək cəhdini rədd edib.
Musavat.com xəbər verir ki, bu barədə “The New York Times” xəbər yayıb.
Razılaşmaya əsasən, baş təşkilatçı Xalid Şeyx Məhəmməd və onun iki köməkçisi günahlarını etiraf etməklə ölüm hökmündən xilas olaraq ömürlük həbs cəzası alacaqlar. Məhkəmə qərarına görə, Lloyd Ostin bu cür razılaşmaları təsdiqləmək hüququna malik olsa da, artıq əldə olunmuş müqavilələri ləğv edə bilməz.
Pentaqon və Ədliyyə Nazirliyi hazırda qərardan sonrakı mümkün addımları nəzərdən keçirir. Bu arada, Xalid Şeyx Məhəmmədin işi üzrə məhkəmə iclasları təxirə salınıb.
Xatırladaq ki, əvvəllər Məhəmməd və onun köməkçiləri razılaşmaya imza ataraq günahlarını etiraf etmişdilər. Məhkəmə qeyd edir ki, onların etirafı əlavə hüquqi proseslərin aparılmasını məhdudlaşdırır. Bu qərar 11 sentyabr hadisələri ilə bağlı hüquqi mübahisələrə yeni bir mərhələ gətirə bilər.
