Azərbaycan Dövlət Aqrar Universitetində (ADAU) 2024/2025-ci tədris ilinin payız semestrinin imtahan sessiyası start götürüb.
AZƏRTAC-ın bölgə müxbiri xəbər verir ki, tələbələrin biliyinin qiymətləndirilməsi test üsulu ilə kompüterdə, yazılı və hesabat formalarında ali təhsil müəssisəsinin İmtahan Mərkəzi tərəfindən təşkil olunur.
İmtahanların gedişinə nəzarət, tələbələrin biliyinin qiymətləndirilməsində şəffaflığı təmin etmək məqsədilə yaradılan İmtahan Qərargahı və Apellyasiya Komissiyası sessiya müddətində imtahanların gedişi ilə əlaqədar ərizə və təklif, Elm və Təhsil Nazirliyinin “Qaynar xətt”i vasitəsilə daxil olmuş şikayətlərin araşdırılmasını təmin edəcək.
Rəhbərliyin tam nəzarəti altında keçiriləcək sessiyada bütün imtahanların mövcud normativ sənədlər əsasında və təlimata uyğun keçirilməsi, nizam-intizamın yüksək səviyyədə təşkili üçün bütün şərait yaradılıb. Tələbələr universitet daxili intizam qaydaları, imtahan cədvəlləri üzrə kafedralarda müvafiq imtahanqabağı məsləhət saatlarının təşkili, eyni zamanda, imtahan nəticələri ilə bağlı Apellyasiya Komissiyasına müraciət qaydaları haqqında ətraflı məlumatlandırılıb.
Sessiya müddətində Əsaslı Kitabxana və bölmələrinin oxu zalları saat 08:30-dan 19:00-dək xüsusi qrafik əsasında fəaliyyət göstərəcək.
Qeyd edək ki, imtahan sessiyası bakalavriat və magistratura səviyyələrində 2025-ci il yanvar 6-dan fevralın 1-dək müddətdə təsdiq olunmuş imtahan qrafikləri əsasında əyani formada keçiriləcək.
DOĞRU.AZ
