Azərbaycanda 2025-ci il üzrə kişilərin və qadınların pensiya yaşı məlum olub
Ajans.az-ın verdiyi xəbərə görə, 1 iyul 2023 - 30 iyun 2024-cü il tarixlərində kişilərin pensiya yaşı 65, qadınların isə 63 il 6 ay təşkil edib.
“Əmək pensiyaları haqqında” qanunun 7-ci maddəsinə əsasən, kişilərin pensiya yaşı 2017-ci il iyulun 1-dən başlayaraq 2021-ci il iyulun 1-dək, qadınların pensiya yaşı isə 2017-ci il iyulun 1-dən başlayaraq 2027-ci il iyulun 1-dək hər il 6 ay artırılır.
Beləliklə, 1 iyul 2024 - 30 iyun 2025-ci il tarixlərində kişilərin pensiya yaşı dəyişməz qalaraq 65 il, qadınların pensiya yaşı isə 6 ay artırılaraq 64 il olacaq.
Qeyd edək ki, “Əmək pensiyaları haqqında” qanunun 7-ci maddəsinə əsasən, pensiya yaşına çatmış şəxsin fərdi hesabında sığorta hissəsində qeydə alınmış pensiya kapitalı əmək pensiyasının minimum məbləğini təmin edirsə, sığorta stajından asılı olmayaraq yaşa görə əmək pensiyası hüququ yaranır. Əgər bu təminat mümkün olmazsa, şəxsin ən azı 25 il sığorta stajı olduğu halda yaşa görə pensiya hüququ əldə edilir.
