Fransanın Milli Cəbhə Partiyasının (hazırda Milli Birlik Partiyasıdır) qurucusu və keçmiş lideri Jan-Mari Le Pen 96 yaşında vəfat edib.
Yeniavaz.com xəbər verir ki, bu barədə Fransanın “Agence France-Presse” (AFP) agentliyi siyasətçinin ailəsinə istinadla məlumat yayıb.
“Jan-Mari Le Pen çərşənbə axşamı saat 12:00-da (Bakı vaxtı ilə saat 14:00-da) ailəsinin əhatəsində vəfat edib”, - deyə agentlik onun ailəsindən sitat gətirib.
Jurnalistlərin məlumatına görə, siyasətçi Fransanın Qarş şəhərindəki xəstəxanalardan birində dünyasını dəyişib.
O, bir neçə həftə əvvəl bu xəstəxanaya yerləşdirilib.
Qeyd edək ki, Jan-Mari Le Pen 20 iyun 1928-ci ildə anadan olub. 1956-cı ildə Fransa parlamentinin ən gənc üzvü olub.
Siyasətçi 1972-ci ildə Milli Cəbhə Partiyasına rəhbərlik edib. Karyerası ərzində Jan-Mari Le Pen beş dəfə ölkə prezidentliyinə namizəd irəli sürülüb və 2002-ci ildə seçkilərin ikinci turuna düşə bilib. Lakin o, cəmi 17,8% səs toplayıb və digər namizəd Jak Şiraka uduzub.
