Xəbər verdiyimiz kimi, Azərbaycan Respublikasının Prezidenti İlham Əliyev yanvarın 7-də yerli televiziya kanallarına müsahibə verib. Müsahibədə Dövlət başçısı Qərbi Azərbaycana qayıdış məsələsinə də xüsusi yer verib.
Azərbaycan Prezidenti Ermənistanın baş nazirinin Qərbi Azərbaycan İcmasının nümayəndələrini görüşməsinin önəmindən söz açıb:
“Bildiyimə görə, onlar İrəvana da getməyə hazırdırlar. Qəbul etsin, onların dilindən onların problemlərini eşitsin, dinləsin onları. Yəni, onlar oradan əsassız qovulmuşlar. Onların tam hüququ var ki, oraya qayıtsınlar”.
Prezident İlham Əliyev bu məsələnin çox ciddi beynəlxalq problem olduğunu da diqqətə çatdırıb:
“Bu, yüz minlərlə insanın hüquqlarının bərpası məsələsidir. Bu, insan hüquqları məsələsidir. Bu, ədalət məsələsidir. Bu, eyni zamanda, göstərəcək ki, indiki Ermənistan rəhbərliyi faşist deyil.
Çünki üç prezident faşist idi. Yəni, onların açıqlamaları, əməlləri, Xocalı soyqırımında üçünün də iştirakı və bir çox digər sübutlar var. Əgər indiki baş nazir demokratdırsa, özü də Avropa demokratiyasının, necə deyərlər, “banisi olan” Fransa prezidenti Makronun dostudursa, qoy, onu göstərsin, qoy, icazə versin. Yəni, bizim istəyimiz bundan ibarətdir və bunu tələb etmək hər hansı bir ərazi iddiasında olmaq demək deyil”.
Bəs Qərbi Azərbaycan İcması Paşinyanla görüşə hazırdırmı?
Məsələ ilə bağlı fikirlərini Bizim.Media ilə bölüşən Qərbi Azərbaycan İcmasının Müşahidə Şurasının sədri Misir Mərdanov deyib ki, İcmanın Mərkəzi aparatında biz bu məsələni dəfələrlə müzakirə etmişik:
“Bu müzakirələrin yekununda İcma Ermənistan hökümətinə müraciət qəbul edib ki, qayıdış məsələni müzakirə edək. Çünki hələ əvvəlki deportasiyaları demirik, sonuncu dəfə -1988-1990-cı illərdə Qərbi Azərbaycanda 200 minə yaxın soydaşımız ən ağır şərtlərdə qovulub. Bu qədər insan on illər boyu qazandıqları maddi və mənəvi sərvətləri qoyub çıxmışdı, necə deyərlər “bir çöp” də götürməmişdi. Ona görə də azərbaycanlıların öz dədə-baba ocaqlarına qayıtmaq haqları var. Bu qayıdış üçünsə ilk növbədə Ermənistan hökuməti ilə danışıqlar aparılıb, razılaşma olmalıdır. Çox təəssüf ki, Ermənistan hakimiyyəti bizim haqlı tələblərimizə heç bir cavab verməyib. Bununla belə biz inanırıq ki, rəsmi İrəvan gec-tez bizim haqlı tələbimizi eşidəcək, ona əməl etməli olacaq.
Bu mənada Prezident İlham Əliyev haqlı olaraq deyir ki, Paşinyan Qərbi Azərbaycan İcmasının nümayəndələrini qəbul etsin. Çünki bu təkcə Qərbi Azərbaycan İcmasının istəyi deyil, həm də Azərbaycan dövlətinin iradəsidir”.
“Mübarizəmizi sona qədər davam etdirəcəyik”
Müsahibimiz onu da əlavə edib ki, hələ 2 il qabaq Qərbi Azərbaycan İcmasının inzibati binasında keçirilən görüşdə Azərbaycan Prezidenti bu məsələyə xüsusi diqqət ayırmışdı:
“Doğrudan da, bizim Qərbi Azərbaycana qayıtmaq hüququmuz var. Sona qədər də bunun üçün mübarizə aparacağıq. Biz bu məsələ ilə bağlı BMT və digər beynəlxalq təşkilatlara da müraciət etmişik ki, öz dədə-baba torpaqlarımıza qayıtmaq üçün vasitəçi olsunlar. Eyni zamanda bu istəyimizin reallaşdırılması prosesinə həm beynəlxalq təşkilatlar, həm də Ermənistan höküməti təminat verməlidir. Çünki bizim istəyimiz beynəlxalq hüquqa və insan haqlarına söykənir. Ona görə də Paşinyan ən qısa zamanda İcmanın nümayəndələrini qəbul etməlidir”.
Nəzərə alaq ki, məsələ ilə bağlı Qərbi Azərbaycan İcması bu gün növbəti dəfə bəyanat yayıb:
“Biz Ermənistan hökumətindən Qərbi azərbaycanlıların deportasiyasına görə üzr istəməyi, Qərbi Azərbaycan İcması ilə dialoqa başlamağı, qayıdışa şərait yaratmağı, Azərbaycan xalqına məxsus olan mədəni irsin dağıdılması və təhrif edilməsi siyasətinə son qoymağı, silahlanmanı dayandırmağı və üzərinə götürdüyü öhdəliklərinə uyğun olaraq kommunikasiya xətlərini açmağı tələb edirik”.
