Los-Ancelesdəki güclü yanğınlar elit Sakit Okean Palisades bölgəsinə, eləcə də ABŞ kino sənayesi və şou-biznesinin paytaxtı olan Hollivud təpələrinə də təsir edib. Yanğınlar nəticəsində Ben Afflek kimi bir çox Hollivud ulduzunun evi yanıb.
Reyting.az ABŞ mətbuatına istinadla bildirir ki, dünyaca məşhur ulduzlar, aktyorlar və müğənnilər yanğın səbəbindən evlərini itirməyə başlayıblar. Belə məşhurların sırasında ulduz aktyor Entoni Hopkinslə yanaşı Adam Brodi, müğənni Peris Hilton və başqaları da var.
Xatırladaq ki, Kaliforniyadakı meşə yanğınları çərşənbə axşamı, yanvarın 7-də başlayıb və daha sonra Los-Ancelesin tarixində ən dağıdıcı yanğına çevrilib. Təkcə şəhər ərazisində yanğın ən azı iki min binanı məhv edib.
Kilometrlərlə ərazini əhatə edən yanğın Sakit okean sahilində, Palisades bölgəsindən Malibuya və Santa Monika şəhərləri arasındakı böyük əraziləri bürüyüb. Bura isə ilk növbədə dəbdəbəli daşınmaz əmlakı ilə tanınan Hollivudun kino ulduzlarının yaşadığı məkanlardır. Artıq onların bir çoxu evlərini itirib və ya təxliyə ediliblər.
Adam Brodinin öz həyat yoldaşı ilə aldığı bu mülkün qiyməti 2019-cu ildə 6,5 milyon dollar olub. Məlumata görə, təxminən iki min kvadratmetr sahəsi olan dəbdəbəli üçmərtəbəli evdə beş yataq otağı və altı vanna otağı yerləşib. Aktyorlar orada iki azyaşlı uşaqla yaşayırdı.
Qorxulu filmləri ilə tanınan aktrisa Anna Faris də öz sevimli villasını itirib. Faris 2018-ci ildə aktyor Kris Prattdan ayrıldıqdan sonra bu mülkü 4,9 milyon dollara alıb. Aktrisa orada operator Maykl Barret və on iki yaşlı oğlu ilə yaşayırdı.
Dərc edilən müxtəlif fotoşəkillər bir daha göstərir ki, onların evindən yalnız yanmış xarabalıqlar qalıb. Aktrisa Anna Farisin nümayəndəsinin sözlərinə görə, vaxtında təxliyə nəticəsində onun ailəsində heç kim xəsarət almayıb.
Yerli mənbələr hələ ki, dəhşətli yanğınlar nəticəsində həyatını itirən amerikalıların sırasında Hollivud kino ulduzlarının, həm də tanınmış müğənnilərin olması barədə heç bir məlumat verməyib.
Oqtay QORÇU
