"Əgər tibb və elm qohum evliliyinin insan sağlamlığına ziyan vurduğunu deyirsə, dinin bu məsələyə yanaşması insandan yanadır. Yəni, bu məsələdə heç bir problem yoxdur".
"Unikal" xəbər verir ki, bunu Milli Məclisin Ailə, qadın və uşaq məsələləri komitəsinin iclasında Dini Qurumlarla İş üzrə Dövlət Komitəsinin sədr müavini Gündüz İsmayılov deyib.
Sədr müavini qohum evliliyinin əleyhinə olduğunu bildirib: “Kimsə əmioğlu və əmiqızının nikahının göydə kəsildiyini deyəndə, zarafatla deyirdim ki, onlar göydə yox, yerdə yaşayır”.
G.İsmayılov vurğulayıb ki, erkən nikahlarla bağlı dindən sui-istifadə edilir: “İslamda bunun qadağan olunmadığı əsas gətirilərək erkən nikaha girirlər. Bugünkü dövr üçün 14 yaşda nikah anormal sayılır. Bu gün yas mərasimlərində olan, qəbiristanlıqlarda dua oxuyan qeyri-rəsmi din xadimlərinin sayı on minlərlədir. Ancaq rəsmi təyinat alan din xadimlərinin sayı isə 1000 nəfərdən çox deyil. Ona görə də maarifləndirmə işlərinin gücləndirilməsi mütləqdir”.
Anar Kəlbiyev
