"Boeing", maliyyə ehtiyatlarını gücləndirmək və reytinqini qorumaq məqsədilə 21 milyard dollar səhm satışı ilə rekord məbləğ əldə edib.
Valyuta.Az-ın verdiyi xəbərə görə, hər bir səhm üçün 143 dollar qiymətləndirmə ilə 112,5 milyon adi səhm satışa çıxarıb. Bu, əvvəlki cümə günü səhm bağlanış qiymətindən (155,01 dollar) təxminən 7,7% aşağıdır. Bundan əlavə, "Boeing" 5 milyard dollar dəyərində depozitar səhm satışı da həyata keçirib.
Səhmlərin satışı ərəfəsində "Boeing" səhmləri ticarət dövründə 0,5% ucuzlaşıb və bu il ümumilikdə 42% enib. Bu, Dow Jones Sənaye Orta İndeksində ən zəif nəticələrdən biridir.
Toplanmış vəsaitlər "Boeing"in yeni baş direktoru Kelli Ortberq üçün şirkətin maliyyə çətinliklərini həll etmək baxımından mühüm addım sayılır. Şirkətin maliyyə vəziyyəti pandemiyanın təsiri və əsas modeli olan 737 Max təyyarəsinin iki qəzası səbəbindən pisləşmişdi. Hazırda vəziyyət təyyarə istehsalını dayandıran yeddinci həftəyə daxil olmuş tətil ilə daha da çətinləşib.
Şirkət bu vəsaitləri investisiya reytinqini qorumaq və tətil başa çatdıqdan sonra istehsal gücünü artırmaq üçün istifadə etməyi planlaşdırır. Gözlənilir ki, IV rübdə "Boeing" təxminən 4 milyard dollar nağd pul xərcləyəcək və bu il ərzində ümumilikdə təxminən 14 milyard dollar xərc olunacaq. Şirkət, o cümlədən 737 Max yığım xətlərinin bərpasını nəzərdə tutan istehsal xərclərinin gələn ilin birinci yarısında da davam edəcəyini proqnozlaşdırır.
III rüb maliyyə hesabatında "Boeing"-in gəliri 17,8 milyard dollar təşkil edib, lakin tətilin təsirləri və müdafiə proqramlarında yaranan problemlər səbəbindən ümumi itkisi 6,2 milyard dollara çatıb. 737 və 787 modellərinin istehsal xətti dayandırılsa da, şirkət bu itkilərin dördüncü rübdə də davam edəcəyini proqnozlaşdırır. Bununla belə, "Boeing"-in gələn ilin ilk yarısında istehsalı bərpa etməyi planlaşdırması və kredit xətlərini 20 milyard dollara qədər artırması şirkətin uzunmüddətli məqsədlərinə dəstək verir.
Qeyd edək ki, "Boeing" işçi qüvvəsini təxminən 10% azaltmağı planlaşdırır və yeni müqavilə təklifi ilə işçi mübahisələrini həll etməyi hədəfləyir. Hazırda əmək haqlarında artım təklifi səsvermədə işçilər tərəfindən nəzərdən keçirilir və bu, davam edən tətilin sona çatması üçün müsbət addım ola bilər. Şirkətin ümumi sifariş portfeli 511 milyard dollar dəyərindədir və bu, növbəti rüblərdə bərpa planlarını dəstəkləyəcək vacib amildir.
Bu tədbirlər "Boeing"-in gələcək dövrdə maliyyə sabitliyini təmin etmək üçün əsas addımlar hesab edilir.
Aydın
