Bu il müəllimlərin işə qəbulu imtahanında 50 264 namizəd iştirak edib.
Onlardan 5740 nəfəri isə müsahibə mərhələsinə buraxılıb. 14-22 avqust tarixlərində təşkil olunan müsahibələrdən isə 4 658 nəfər uğur qazanıb.
Bəs, görəsən, namizədlərdən neçəsi ilk dəfə MİQ-də iştirak edib?
Modern.az xəbər verir ki, AzEdu.az Təhsil Portalı olaraq mövzu ilə əlaqədar Məktəbəqədər və Ümumi Təhsil üzrə Dövlət Agentliyinə (MÜTDA) sorğu ünvanlayıb.
Bildirilib ki, cari ildə 4800-ə nəfərə yaxın namizəd ilk dəfə müsabiqədə iştirak edib:
“Müəllimlərin işə qəbulu üzrə müsabiqənin məqsədi bilik və bacarıqları yüksək, perspektivli müəllimləri seçmək və tədris prosesinin keyfiyyətini yüksəltməkdir. Proses 2011-ci ildən etibarən mərkəzləşdirilmiş qaydada həyata keçirilir.
Müəllimlərin işə qəbulu üzrə müsabiqə paytaxt və böyük şəhərlərlə yanaşı, ölkənin müxtəlif kənd və ucqar məktəblərində də keyfiyyətli pedaqoji kadr təminatını həyata keçirməyə imkan verir. Cari ildə ilk dəfə iştirak edən 4800 nəfərə yaxın namizədin 530 nəfəri müddətsiz, 119 nəfəri isə müddətli müqavilə əsasında olmaqla, ümumilikdə 649 nəfər işlə təmin olunub”.
