“Qarabağ”ın prezidenti Tahir Gözel Avropa Liqasının Liqa mərhələsinin IV turunun “Bodo-Qlimt” – “Qarabağ” matçından (1:2) sonra klubun saytına açıqlama verib.
Apasport.az xəbər verir ki, o, xalqımızı 8 noyabr – Zəfər Günü, komandanı Avropa Liqasının yeni formatda keçirilən əsas mərhələsində ilk qələbə münasibətilə təbrik edib:
“Xalqımızı 8 noyabr – Zəfər Günü münasibətilə təbrik edirəm. Ali Baş Komandanımız Cənab İlham Əliyevin başçılığı altında Müzəffər Ordumuzun qazandığı qələbənin ildönümü ərəfəsində “Qarabağ” növbəti qalibiyyətini əldə etdi. “Bodo-Qlimt”ə qarşı səfərdəki matç çox ağır oldu. Rəqibin nə qədər güclü komanda olduğunu Avropa Liqasının liderləri sırasında yer alması da göstərir. “Bodo-Qlimt” güclü rəqabətin olduğu Norveç çempionatında da liderdir. İlk üç turda uduzmayan, “Porto” kimi adlı-sanlı bir klubu məğlub edən komanda ilə qarşılaşırdıq. “Bodo-Qlimt” ilk məğlubiyyətini komandamızdan aldı. Komandamla fəxr edirəm. Üstəlik, süni meydanda oynamalı olduq. Lakin rəqibin kimliyindən asılı olmayaraq, həmişə olduğu kimi, komandamıza inamımız böyük idi. Möhtəşəm mübarizə və qələbəyə görə futbolçularımıza təşəkkür edirəm. Çətin şimal səfərində komandamızı tək qoymayan azarkeşlərə də minnətdaram. Çox çətin oyunda vacib qələbə qazandıq. Bu komandaya inamım sonsuzdur. Mərhələnin sonuna qədər daha 4 oyunumuz var. Əminəm ki, komandamız gözəl oyunu ilə azarkeşlərimizi sevindirməkdə davam edəcək. Nəticələrdən asılı olmayaraq, ölkəmizi layiqincə təmsil etmək üçün əlimizdən gələni edəcəyik”.
"SKA-Xabarovsk"un futbolçusu: "Azərbaycan millisində oynamağa hazıram"
"Neftçi" "Şamaxı" ilə görüşə itkilərlə çıxacaq
Əfran İsmayılov: "Bodo-Qlimt"i digər komandalarla bir tutmuram"
"Sumqayıt"da "yarpaq tökümü" - komandada kütləvi ayrılıq
Azərbaycan millisinin üzvləri danışılmış oyunlarla bağlı seminarda iştirak ediblər
