Niderlandlı mütəxəssis, “Mançester Yunayted”in müvəqqəti baş məşqçisi çalışmış Rud van Nistelroy kluba vida məktubu ünvanlayıb.
Arena.az məlumat verir ki, Van Nistelroy məktubu özünün rəsmi “X” sosial şəbəkə hesabı üzətindən paylaşıb:
“Mançester Yunayteddəki hər kəsə, xüsusən də heyətə, oyunçulara və azarkeşlərə.
İnanılmaz səylərinizə və dəstəyinizə görə sizə ürəkdən təşəkkür etmək istəyirəm. Bir oyunçu, məşqçi və idarəçi kimi klubu təmsil etmək mənim üçün böyük şərəf idi və mən birlikdə paylaşdığımız xatirələri həmişə yaşadacağam. “Mançester Yunayted” hər zaman ürəyimdə xüsusi yer tutacaq və ümidvaram ki, şöhrətli günlər tezliklə “Old Traffor”da qayıdacaq – təkcə klubun uğur qazanmasını istədiyim üçün deyil, hamınız buna layiq olduğunuz üçün! Ən xoş arzularla və özünüzü qoruyun, Rud”, – niderlandlı mütəxəssis duyğusalcasına dərc edib.
Xatırladaq ki, Rud van Nistelroy həmyerlisi, onu kluba gətirmiş niderlandlı mütəxəssis Erik ten Haqın istefaya göndərilməsindən sonra, “Mançester Yunayted”in müvəqqəti çalışdırıcı kimi fəaliyyət göstərib. Van Nistelroy “Mançester Yunayted”i 4 oyuna çıxarıb, 3 qələbə qazandırıb və 1 heç-heçə edib. Topların fərqi isə 11:3 nisbətindədir.
Vurğulanır ki, “Mançester Yunayted” futbolçuları van Nistelroyun işindən razı qalıb, niderlandlı mütəxəssisin onlara təsirini “əla” qiymətləndiriblər. Həmçinin klub rəhbərliyinin də Van Nistelroyun fəaliyyətindən məmnun qaldığı bildirilir.
Xatırladaq ki, “qırmızı şeytanlar”ın sükanı arxasına portuqal mütəxəssis Ruben Amorim gətirilib və yeni baş məşqçi noyabrın 11-də rəsmən fəaliyyətinə başlayıb. Məhz Amorim, daha əvvəl klubun düşərgəsində qalmağa və “qırmızı şeytanlar”a kömək etməyə hazır olduğunu bildirmiş Rud van Nistelroyu özünün məşqçilər qərargahında görmək istəmədiyi üçün, niderlandlı mütəxəssis “Mançester Yunayed” ayrılıb.
