Fransalı yarımmüdafiəçi Pol Poqba ötən gün yollarını ayırdığı İtaliyanın “Yuventus” klubunun azarkeşlərinə müraciət ünvanlayıb.
Arena.az xəbər verir ki, təcrübəli futbolçu bunları qeyd edib:
“Elə vaxtlar olur ki, işlər istədiyimiz kimi getmir. Ancaq bir xüsus dəqiqdir: məni sizinlə, əziz azarkeşlər, birləşdirən bağ unudulmaz olaraq qalacaq. Siz mənə sözlə ifadə edə bilməyəcəyim qədər çox şey bəxş etmisiniz və mənə verdiyiniz bütün məhəbbəti həmişə özümlə daşıyacağam. Siz mənim qəlbimdə əbədi qalacaqsınız. Uğurlar, “Yuventus”, – Poqba özünün sosial şəbəkə hesabı üzərindən “byankoneri”yə vida müraciətini ünvanlayıb.
Xatırladaq ki, “Yuventus” ötən gün mərkəz yarımmüdafiəçisi ilə müqaviləyə xitam verildiyini açıqlayıb. Poqbanın “qoca sinoya” ilə müqaviləsi rəsmən noyabrın 30-da xətm ediləcək. Fransalı futbolçunun Turin klubu ilə müqaviləsi 2026-cı ilin iyun ayının sonuna qədər qüvvədəydi. Poqba “Yuventus”u azad agent qismində tərk edib. Onun karyerasını harada davam etdirəcəyi hələ ki, məlum deyil.
Ötən ilin avqustunda fransalı futbolçu dopinq müayinəsindən müsbət nəticə ilə keçib. Fevralın 29-da antidopinq məhkəməsi Poqbanın 4 il müddətinə futboldan kənarlaşdırılması qərarını təsdiqləyib. Məhkəmə Poqbanın futbolçu fəaliyyətinin dayandırılmasına qərar verdikdən sonra, fransalı futbolçu müvafiq qərardan apellyasiya şikayəti vermişdi. Artıq məlum olduğu kimi, İdman Arbitraj Məhkəməsi (CAS) Poqbanın dopinq istifadəsi ilə bağlı cəzasının müddətini azaldıb. Fransalı futbolçunun cəza müddəti daha əvvəl təyin edilmiş 4 il müddətindən 1 il 6 aya endirilib. Gələn ilin martına qədər Poqbanın rəsmi oyunlarda iştirakına icazə veriləcək.
Pol Poqba “Yuventus”a 2022-ci ilin iyul ayında “Mançester Yunayted”dən keçmişdi. O, İtaliya klubunun heyətində ümumilikdə 190 oyuna çıxıb, 34 qol vurub və 41 məhsuldar ötürmə verib.
Fransalı futbolçu daha öncə yalnız “Mançester Yunayted”də forma geyinib.
Pol Poqba 2013-cü ilin mart ayında debüt etdiyi Fransa yığmasının heyətində 91 oyun keçirib, 11 qol vurub, 9 məhsuldar ötürmə verib. Poqba “xoruzlar”la, 2018-ci ildə Rusiyada keçirilmiş dünya çempionatının qalibi olub.
