84 yaşlı usta aktyor Al Paçinonun rol aldığı yeni qorxu filmi “The Ritual”dan xəbər var.
Hafta.az-ın “Screen Rant”a istinadən yazdığına görə, Amerikanın müstəqil prodüser şirkəti XYZ Films, rejissor Devid Midellin çəkdiyi və gələn il təqdim olunacaq “The Ritual” filminin yeni afişasını təqdim edib. Filmdə rol alan Akademiya mükafatı laureatı Al Paçinonu Eşli Qrin, Patrisiya Hiton, Abiqail Koven, “The Guest” və “Abigail” filmləri ilə tanınan Den Stivens müşayiət edəcək.
Maraqlı layihə, cin tutmuş gənc qadına kömək etmək üçün birlikdə işləməli olan müxtəlif mənşəli iki keşişin hekayəsindən bəhs edir.
“Collider” yazır: "Al Paçinonun canlandırdığı keşiş qaranlıq keçmişi ilə mübarizə apararkən, Den Stevensin canlandırdığı keşiş onun imanını şübhə altına alacaq".
Filmin 18 aprel 2025-ci ildə kinoteatrlarda nümayişi planlaşdırılır.
Qışqıran qadının təsvir olunduğu ürpertici afişada hekayənin “gerçək hadisələrə əsaslandığı” da bildirilir.
Ritualın rejissoru olan amerikalı kinorejissor Midell bundan əvvəl tənqidçilərin rəğbətini qazanmış 2014-cü ildə “Night Lights” və 2019-cu ildə “The Killing Of Kenneth Chamberlain filmini çəkmişdi.
Filmin ssenarisini Midell və 42 yaşlı prodüser Enriko Natale birgə yazıblar.
2023-cü ilin iyul ayında Al Paçinonun layihədə iştirak etdiyi açıqlanıb. Filmin çəkilişlərinə 2024-cü ilin yanvarında Missisipi ştatının Natçez şəhərində başlanılıb.
