Braziliya millisinin və “Əl-Hilal”ın ulduz hücumçusu Neymar karyerasına nəzər salıb, təhlil edərək, qiymətləndirmə aparıb.
Arena.az “RMC Sport” dərgisinə istinadən, braziliyalı ulduzun bu barədə qənaətini təqdim edir:
“Mənim ən yaxşı idman illərim PSJ-də olub. Amma bu, çox kədərli idi, çünki mən tez-tez üç-dörd ay davam edən çox ciddi xəsarətlər alırdım. Bu, məni həqiqətən narahat edib. Amma futbol baxımından PSJ-dən olan Neymar, bütün karyeramın ən yaxşı Neymarıdır. Futbolumu fransızlara təklif edə bildiyim üçün xoşbəxtəm”.
Brazliyalı ulduz karyerasından razı olub-olmadığı ilə bağlı sualı isə belə cavablayıb:
“Həqiqət mənim uşaqlıqda qurduğum bütün xəyalları üstələdi. Kiçik olanda arzum “Santos”da və Braziliya millisində oynamaq idi. Amma tanrı mənə daha çoxunu nəsib etdi.
Karyeramdan çox razıyam, çox böyük klublarda oynamışam. Bu gün isə mən “selesao” tarixinin ən sərrast qolçusuyam, buna nail olduğum üçün çox şadam. Bu, böyük iş idi və mən buna çox səy göstərdim. Mən özümü milli komandaya həsr etmişəm. Ölkəniz üçün tarix yazmaq möhtəşəm bir işdir, şərəfdir. Düşünürəm ki, övladlarım, mənim, ölkəmin tarixində önəmli biri olduğumu görəcəklər”.
Neymarın karyerası rəqəmlərin gözü ilə
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış etmiş və “blauqrana”nı öz istəyi ilə tərk edərək, PSJ-yə keçmişdi. Bu keçid hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Braziliyalı futbolçu ötən il DÇ-2026-nın seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə alaraq, dizinin çarpaz bağlarını yırtmış və bu səbəblə cərrahi əməliyyat edilmişdi. “Ney” ötən həftə Asiya Çempionlar Liqasının “Əl-Ayn”a qarşı oyununda nəhayət ki, yaşıl meydanlara qayıtmışdı. Buna rəğmən “Ney” növbəti oyununda yenidən zədə alaraq, iki həftə müddətinə sıradan çıxıb.
Avropada debütü “Barselona” ilə başlamış Neymar daha sonra Kataloniya klubunu öz isətəyi ilə tərk edib. 2023-cü ilin yayında, PSJ-də 6 il keçirdikdən sonra Neymar “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib. Bu məbləğ Neymarın təxmin edilən bazar qiymətindən dəfələrlə bahadır.
Təcrübəli hücumçu ötən mövsüm “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı ulduz hücumçunun transfer dəyərini 15 milyon avro məbləğində qiymətləndirir.
