Azərbaycan Silahlı Qüvvələrinin giziri olan Elvin Orucov 1991-ci il dekabrın 18-də Qazax rayonunda anadan olub.
QHT.az xəbər verir ki, o, 2010-2012-ci illərdə müddətli həqiqi hərbi xidmətdə olub, 2013-cü ildən etibarən isə "gizir" rütbəsində xidmətini davam etdirib. 2016-cı ilin Aprel döyüşlərinin də iştirakçısı olan Elvin Orucov 2020-ci ilin 27 sentyabrında başlanan Vətən müharibəsi zamanı Füzuli istiqamətində gedən döyüşlərə qatılıb və sentyabrın 27-də qəhrəmancasına şəhid olub.
Bütün şəhidlərimiz kimi Elvin Orucovun da göstərdiyi şücaət dövlətimiz, ölkə rəhbəri tərəfindən yüksək qiymətləndirilib. Orden və medallarla təltif olunan şəhidlərimizin arasında şəhid gizirimizin də adı var. E.Orucov ölümündən sonra cənab Prezident İlham Əliyevin 15 dekabr 2020-ci il tarixli Sərəncamına əsasən "Vətən uğrunda” , 25 dekabr 2020-ci il tarixli Sərəncamına əsasən "Füzulinin azad olunmasına görə” medalları ilə təltif edilmişdir.
Ruhu şad olsun!
