Braziliyalı futbol əfsanəsi Ronaldo, həmvətəni Vinisius Juniora FIFA-dan ilin oyunçusu mükafatını qazanması ilə bağlı təbrik ünvanlayıb.
Arena.az “Yekədiş”in bu barədə müraciətini təqdim edir:
“Onlar səni silməyə çalışdılar, dostum, amma sən rəqs etməyə davam etdin. Dünyanın ən yaxşı oyunçusu qaradərili və braziliyalıdır”, deyə Ronaldo vurğulayıb.
Digər braziliyalı əfsanəvi veteran futbolçu Ronaldinyo da Vinisius Juniorun bu uğuruna biganə qalmayıb. O, müraciətində bunları qeyd edib:
“Təbrik edirəm, “Vini”! Artıq iki ildir ki, sən Braziliya futbolu üçün bir ölçü olmusan və bu mükafata tam layiqsən! Gülümsəməyə davam et və minlərlə gənc idmançını futbolçu kimi arzularına və karyeralarına inanmağa ruhlandır…”, deyə Ronaldinyo bildirib.
Braziliya millisinin və “Əl-Hilal”ın ulduz hücumçusu Neymar da Vinisius Juniora müraciət ünvanlayıb:
“Təbrik edirəm, “Vini”! Sən buna layiqsən. Mən sənə görə səmimi qəlbdən sevinirəm. Dayanma və eyni ruhda da davam et”, deyə Neymar vuğrulayıb.
“Real”ın fransalı ulduz hücumçusu Kilian Mbappe də Madrid klubundakı komanda yoldaşını təbrik edib. “Layiqsən, qardaş” – Mbappe özünün sosial şəbəkə səhifəsində Vinisiusun mükafatla birlikdə şəklini əlavə edərək paylaşıb.
Xatırladaq ki, Kilian Mbappe özü bu səsvermədə 14 xal toplayaraq 9-cu yeri tutub. Vinisius Junior isə səsvermədə 48 xal toplayaraq, “France Football” tərəfindən “Qızıl top” mükafatını almış, İspaniya yığmasının və “Mançester Siti”nin dayaq yarımmüadafiəçisi Rodrini qabaqlayıb. Rodri öz nöbbəsində 43 xal toplayıb.
