"Qarabağ"ın hücumçusu Olavio Juninyo Avropanın daha bir tanınmış klubunun maraq dairəsindədir.
QOL.az xəbər verir ki, bu haqda İspaniyanın AS nəşri məlumat yayıb.
Daha öncə İspaniyanın "Sevilya" klubu Juninyo üçün "Qarabağ"a rəsmi təklif göndərib. Ağdam klubunun direktoru Emrah Çelikel hələ 2 gün öncə QOL.az saytına verdiyi açıqlamada məlumatı təsdiqləyərək “Sevilya”dan Juninyoyaya görə rəsmi təklif aldıqlarını söyləyib. Bununla belə, o, maddi məsələdə razılığa gəlmədiklərini də söyləmişdi:
“Əvvəla qış fasiləsi zamanı futbolçu tapmaq hər bir klub, o cümlədən bizim üçün çətin olur. “Sevilya” klubuna göndərdiyimiz rəsmi cavabda onlara futbolçumuza göstərdikləri maraqları üçün təşəkkürümüzü bildirməklə yanaşı qarşı tərəfdən təklif olunan məbləğin klubumuzun tələbinə cavab vermədiyini də qeyd etmişik”.
"AS" nəşri yazır ki, vinger və hücumçu almaq istəyən "Sevilya" üçün Juninyonun transferi favoritdir. Lakin qəzet onu da qeyd edir ki, "Qarabağ" braziliyalıya görə çox pul tələb edir.
Klubun belə bir maliyyə təklifi irəli sürməyi düşündüyünü yazan qəzet Juninyonun özündən də təzyiq jesti gözləyir.
Qəzetin yazdığına görə, hazırda Çempionlar Liqasında yarışan Serbiyanın "Srvena Zvezda" klubu da Juninyonu heyətinə cəlb etmək istəyir.
