Sumqayıtda sürücü və piyadaların intizam məsuliyyətinin artırılması məqsədi ilə polis profilaktik tədbir keçirib.
"Qafqazinfo" xəbər verir ki, Sumqayıt ŞPİ-nin DYP Şöbəsinin yol hərəkəti təhlükəsizliyinin təmin edilməsi, sürücü və piyadaların intizam məsuliyyətinin artırılması məqsədi ilə keçirdiyi tədbirdə qaydaları pozan çoxsaylı sürücülər saxlanılıb.
Belə ki, Sumqayıt şəhərində piyada keçidindən düzgün istifadə etməyən şəxslərlə maarifləndirici söhbətlər aparılıb onlara yol hərəkəti qaydalarına riayət etməyin vacibliyi barədə məlumat verilib.
Şəhər ərazisində keçirilən profilaktik tədbirlərin davamı olaraq avtomobili spirtli içkinin təsiri altında idarə edən, kobud qayda pozuntularına, nəqliyyat vasitəsinin konstruksiyasında dəyişikliklər edən və sürücülük hüququ olmadan sükan arxasına əyləşən sürücülər də yol polisləri tərəfindən aşkar olunublar. Həmin şəxslər barəsində inzibati protokollar tərtib edilib.
Sumqayıt şəhəri ərazisində yol hərəkəti təhlükəsizliyinin təmin edilməsi məqsədi ilə polis əməkdaşları tərəfindən profilaktik tədbirlər mütəmadi olaraq davam etdiriləcək.
