“Gənclər və idmançıların həmrəylik festivalı” - MASALLIDA
Masallı rayonunda 31 Dekabr – Dünya Azərbaycanlılarının Həmrəylik Günü münasibəti ilə “Gənclər və idmançıların həmrəylik festivalı” keçirilib.
Dekabrın 19-da Heydər Əliyev Parkında Lənkəran-Astara Regional Gənclər və İdman İdarəsi, Masallı Rayon İcra Hakimiyyəti, Lənkəran-Astara Regional Mədəniyyət İdarəsinin birgə təşkilatçılığı ilə gerçəkləşən festivalda Masallı Rayon İcra Hakimiyyətinin başçısı Araz Əhmədov, Lənkəran-Astara Regional Gənclər və İdman İdarəsinin rəisi Teymur Babazadə və digər rəsmi şəxslər, fəxri qonaqlar, ictimaiyyət nümayəndələri iştirak ediblər.
Əvvəlcə Dövlət Himnimiz səslənib, şəhidlərimizin əziz xatirəsi bir dəqiqəlik sükutla yad olunub.
Sonra tədbir iştirakçıları Masallı Gənclər Evinin, Masallı Dövlət Rəsm Qalereyasının, tarix-diyarşünaslıq muzeyinin, mərkəzi kitabxana sisteminin,11 illik incəsənət məktəbinin, Regional İnkişafın Dəstəklənməsi İctimai Birliyinin, Əlil Sahibkarlar İctimai Birliyinin və digər yaradıcı gənclərin rəsm və əl işləri, xalq sənətkarlığı (dulusçulq, misgərlik, xalçatoxuma) stendlərinə baxış keçirib, Masallı Uşaq-Gənclər İdman Məktəbinin, Masallı Uşaq-Gənclər İdman-Şahmat Məktəbinin, Masallı PFK-nin idmançılarının nümunəvi çıxışlarını izləyiblər.
Masallı Rayon İcra Hakimiyyətinin başçısı Araz Əhmədov, Lənkəran-Astara Regional Gənclər və İdman İdarəsinin rəisi Teymur Babazadə, dünya yaddaş çempionu Orxan İbadov 2024-cü ilin Azərbaycan idmanı, o cümlədən regionumuz üçün uğurlu keçdiyini qeyd edərək, bu münasibətlə idman ictimaiyyətini təbrik ediblər.
Çıxışlarda vurğulanıb ki, ölkə başçısı, Milli Olimpiya Komitəsinin prezidenti İlham Əliyevin və Birinci vitse-prezident Mehriban Əliyevanın digər sahələrdə olduğu kimi gənclər və idman sahəsinə də diqqət və qayğısı böyükdür, məhz bunun nəticəsidir ki, idmançılarımız bu il Yay Olimpiya oyunlarında böyük uğurlara imza atdılar.
2024-cü il ərzində uğur qazanan gənclər, idmançılar, eləcə də birgə əməkdaşlığa görə bir neçə təşkilat və media nümayəndəsi Lənkəran-Astara Regional Gənclər və İdman İdarəsinin diplom, təşəkkürnamə və hədiyyələri ilə təltif olunublar.
Tədbir Masallı Mədəniyyət Mərkəzi solistlərinin, “Halay” folklor kollektivinin və gənc musiqiçilərin ifasında maraqlı konsert proqramı ilə davam edib.
Akif AĞAYEV,
foto: Elsevər Əliyev
