"Sumqayıt"la görüşdə 0:0 hesablı heç-heçəyə razılaşan "Kəpəz" klubunun baş məşqçisi Azər Bağırov sosial şəbəkə hesabında müəmmalı paylaşım edib. Paylaşımı oxuyanlar onu vida sözləri kimi qəbul ediblər.
İdman.biz-in məlumatına görə, bu barədə Oxu.Az-a açıqlama verən "Kəpəz" klubunun baş məşqçisi Azər Bağırov oyundan sonra əsəblərin gərgin olması səbəbindən azarkeşlərlə üzləşə bilmədiyi üçün belə bir addım atdığını bildirib.
"Mənim "Kəpəz"dən ayrılmaq kimi bir düşüncəm yoxdur. Əlimizdən gələnin ən yaxşısını edib komandanı bu vəziyyətdən çıxaracağıq. Qaldı ki sosial media hesabından etdiyim paylaşıma, bu, sadəcə, səmimi olaraq azarkeşlərə təşəkkür etmək istəyimdən qaynaqlanır. Oyun başa çatdıqdan sonra əsəblər gərgin olur. İstər bizim, istərsə də azarkeşlərin dedikləri münaqişə yaranmasına səbəb ola bilər. Görüş bitdikdən sonra onların yanına gedə bilmədiyim üçün sosial media hesabımdan onlara təşəkkür etmək istədim. Təbii ki, təşəkkürüm əsl "Kəpəz" azarkeşlərinə idi, aranı qarışdırmaq istəyənlərə yox", - deyə A.Bağırov bildirib.
Qeyd edək ki, "Kəpəz" klubu Azər Bağırovun başçılığı altında 14 oyunda beş qələbə qazanıb, iki dəfə isə heç-heçə edib. Komanda yeddi matçda məğlubiyyətlə barışıb.
İdman.biz
