21 dekabr 2024-cü il tarixində Yeni Azərbaycan Partiyası Hacıqabul rayon təşkilatı, Şirvan-Səlyan Regional Gənclər İdman İdarəsinin Hacıqabul rayon sektoru, Gənclərin İnkişafı və Karyera Mərkəzinin Hacıqabul rayon nümayəndəliyinin birgə təşkilatçılığı ilə 31 dekabr – Dünya Azərbaycanlılarının Həmrəylik günü münasibətilə rayonda yerləşən idarə, təşkilat və müəssisələrin əməkdaşları arasında “Həmrəylik Kuboku” adlı “Nə? Harada? Nə zaman?” intellektual turniri keçirildi.
“İki sahil”in məlumatına görə, ilk öncə Azərbaycan Respublikasının Dövlət Himni səsləndirildi, Ulu Öndər Heydər Əliyevin və torpaqlarımız uğrunda canlarını qurban vermiş şəhidlərimizin əziz xatirəsi bir dəqiqələik sükutla yad edildi.
YAP Hacıqabul rayon təşkilatının sədri İsmayıl İbrahimov çıxış edərək həmrəylik gününün tarixindən söz açdı və məhz bu günün xalqımızı birləşdirən, milli dəyərlərimizi yaşadan böyük əhəmiyyət daşıyan bir bayram olduğunu qeyd etdi. Tədbir iştirakçılarını təbrik edərək, turnirdə yarışacaq komandalara uğurlar arzuladı.
Şirvan-Səlyan Regional Gənclər İdman İdarəsinin Hacıqabul rayon sektorunun müdiri Xalid Rəcəbli və Gənclərin İnkişafı və Karyera Mərkəzinin Hacıqabul rayon nümayəndəliyinin rəhbəri Həbib İbrahimov da çıxış edərək yarış qarşıdan gələn Dünya Azərbaycanlılarının Həmrəylik Günü və Yeni İl bayramları münasibətilə turnirə dəvət olunanları təbrik etdilər və iştirakçılara uğurlar arzuladılar.
“AFFA” Ailəvi İstirahət Mərkəzində keçirilən turnirdə Hacıqabul rayonunda fəaliyyət göstərən idarə, təşkilat və müəssisələrin əməkdaşlarından ibarət 8 komanda mübarizə aparırdı. Ümumilikdə üç turdan ibarət keçirilən yarışda turlar arası fasilələrdə iştirakçılara çay və şirniyyatlar təqdim edildi.
“Həmrəylik Kuboku” turnirində birinci yeri Şirvan-Səlyan Regional Təhsil İdarəsinin Hacıqabul rayonu üzrə Təhsil sektorunun “Təhsil” komandası, ikinci yeri Kapital Bank ASC-nin Hacıqabul filialının “Birbank Teams” komandası, üçüncü yeri isə Hacıqabul rayon İcra Hakimiyyətinin “Zəfər” komandaları qazandılar.
Qaliblər diplom, medal, kubok və qiymətli hədiyyələrlə mükafatlandırıldılar. Turnir Yeni Azərbaycan Partiyası Himninin sədaları altında sona çatdı.
