1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Qazaxıstanın nəqliyyat naziri Marat Karabayev AZAL-a məxsus təyyarənin qəzaya uğramasının təfərrüatlarını açıqlayıb.
Oxu.Az xəbər verir ki, bu barədə "Kazinform" məlumat yayıb.
"Hava limanının qəza xidmətləri təyyarəni qəbul etməyə hazır idi. Ekipaj Qazaxıstanın hava məkanına daxil olduqdan sonra Aktau şəhərinin qüllə dispetçeri ilə əlaqə yaradıb. Dispetçer təyyarənin aerodroma enməsi üçün bütün lazımi tədbirləri operativ şəkildə həyata keçirib. Bundan əlavə, uçuş-eniş zolağı ilə vizual əlaqənin qurulmasını asanlaşdırmaq üçün zolağın işıqları yandırılıb", - Karabayev qeyd edib.
Onun sözlərinə görə, ekipaj Aktau aerodromunun uçuş-enmə zolağına daxil olmağa iki dəfə cəhd edib və bu zaman təyyarənin hündürlüyündə xaotik dəyişikliklər müşahidə olunub. Nazir təyyarənin sahil xəttinə doğru yönəldiyini bildirib.
"Saat 11:28-də ekipajla əlaqə itib və təyyarə yerə çırpılıb. Aktau hava limanının xilasetmə xidməti dərhal hadisə yerinə gəlib və sərnişinlərin təxliyəsinə başlayıb. Bu gün Qazaxıstan Nəqliyyat Nazirliyinin Nəqliyyatda İnsidentlərin və Hadisələrin Araşdırılması Departamentinin mütəxəssislərindən ibarət xüsusi komissiya tərəfindən araşdırma aparılır", - Karabayev əlavə edib.
"Qazaxıstan Respublikasının hava məkanına daxil olmamışdan əvvəl təyyarənin idarəetmə sistemləri, hündürlük şturvalı və eleronları sıradan çıxıb", - deyə Karabayev bildirib.
Nazirin sözlərinə görə, ekipaj sabit kursu və yüksəkliyi saxlaya bilməyib.
"Rostov aviadispetçerinin bildirdiyinə görə, Mahaçqala və Bakıda hava məlumatlarını təqdim etdikdən sonra ekipaj Aktauya uçmaq qərarına gəlib. Saat 10:53-də Rostov hava limanının uçuş direktoru Aktau qülləsində uçuş direktoruna oksigen balonunun olması ilə bağlı əlavə məlumat verib. Təyyarənin sərnişin salonunda partlayış baş verib, sərnişinlər huşlarını itirib", - nazir izah edib.
