"Formula 1" üzrə Azərbaycan Qran-prisində ötən illə müqayisədə tribunaların tutumu 35 faiz artıb.
Gundem.az-ın məlumatına görə, bu barədə Bakı Şəhər Halqası Əməliyyat Şirkətinin baş direktoru Maqsud Fərzullayev “Euronews” telekanalına müsahibəsində bildirib.
M.Fərzullayev bildirib ki, Formula 1 qlobal miqyasda genişlənən və inkişaf edən bir idman növüdür:
“Bu yarışa ev sahibliyi etmək ölkəmizin beynəlxalq nüfuzunu artırmaqla yanaşı, həm də ona böyük iqtisadi imkanlar qazandırır. Turizmdən əldə edilən gəlirlər, xarici qonaqların şəhərə olan marağı və iqtisadiyyata verdiyi töhfə 2016-cı ildən bəri hər il daha da artmaqdadır".
Vurğulanıb ki, yarış həftəsində Bakıya turist və azarkeş axını gözlənilir.
Qeyd edək ki, müsahibədə 13-15 sentyabr tarixlərində baş tutacaq Azərbaycan Qran-prisinin təşkilində 1500 -ə yaxın əməkdaşın, 2000 könüllü və 1400 -dən çox marşalın cəlb olunması, Bakı Halqasının ərsəyə gəlməsində istifadə olunan ən son texniki yeniliklərin tətbiqi, yol infrastrukturundakı müsbət dəyişikliklər, təhlükəsizlik və ətraf mühitin qorunması məsələlərindən də bəhs olunub. (Sfera.az)
