Azərbaycan 2024-cü ildə iqlim dəyişikliyinə qarşı mübarizədə əhəmiyyətli addım atır, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasını (COP29) qəbul edir. İqtisadiyyat Nazirliyinin himayəsi altında AZPROMO COP29-u fəal şəkildə dəstəkləyərək, əməkdaşlıq və tədbirlərin təşviqinə yönəlmiş bir sıra tədbirlər planlaşdırır.
Trend xəbər verir ki, bunu İxracın və İnvestisiyaların Təşviqi Agentliyinin (AZPROMO) icraçı direktorunun müavini Tural Hacılı Bakıda keçirilən beynəlxalq “Davamlı İnkişaf və İqlim İnnovasiyaları Forumu"nda deyib.
"Bakı İqlim Dəyişikliyi ilə Mübarizə Həftəsi" keçiriləcək. Bu çərçivədə AZPROMO bir neçə tematik dəyirmi masa təşkil edəcək, o cümlədən, “sıfır emissiya ilə gəmiçilik”, “davamlı maliyyələşdirmə”, “süni intellekt” və “dövri iqtisadiyyat prinsipləri” mövzularında müzakirələr olacaq.
Bu müzakirələr innovasiyaların təşviqinə, iqlim dəyişikliyinə davamlılığın artırılmasına, Azərbaycanda və onun hüdudlarından kənarda "yaşıl" artım təşəbbüslərinin sürətləndirilməsinə yönəlib. Belə tematik dəyirmi masalar müxtəlif tərəflər arasında, o cümlədən, biznes, dövlət qurumları və beynəlxalq təşkilatlar arasında əməkdaşlığı təşviq edəcək. Bu dialoqu dəstəkləyərək, AZPROMO Azərbaycanın davamlı inkişaf məqsədlərinə çatmaq üçün praktik nəticələr əldə etməyə ümid edir", - deyə T.Hacılı bildirib.
Onun sözlərinə görə, COP29 zamanı "Bakı İqlim Maliyyələşdirmə, İnvestisiyalar və Ticarət Dialoqu" (BICFIT) həyata keçiriləcək.
"14 noyabrda COP29-da maliyyə, investisiya və ticarət günü çərçivəsində COP29 sədri tərəfindən nəzərdə tutulmuş 14 təşəbbüsdən biri olan “BİCFİT Dialogue”nu həyata keçirəcəyik. Bu proqram çərçivəsində iqlim dəyişikliyi ilə mübarizə strategiyalarını müzakirə etmək üçün yüksək səviyyəli dialoqlar və iclaslar təşkil olunacaq", - o vurğulayıb.
O qeyd edib ki, COP29 çərçivəsində 14 noyabrda AZPROMO, həmçinin, Ümumdünya İqtisadi Forumu (WEF) və Beynəlxalq Maliyyə Korporasiyası (IFC) ilə birgə İqlim Biznes İnvestisiyaları və Filantropiya Platformasında iştirak edəcək.
"Bu platforma biznes liderlərinə, filantropistlərə və investorlara iqlim dəyişikliyi ilə mübarizəyə və davamlı inkişaf məqsədinə sadiqliklərini nümayiş etdirmək imkanı verəcək. Əsasən, uzunmüddətli proqram çərçivəsində "İqlim Maliyyələşdirmə Təşəbbüsü" təqdim ediləcək. WEF ilə birgə müzakirə sessiyası xarici investorlardan iqlim məqsədlərinə dəstək verənləri müvafiq yerli şirkətlərlə əlaqələndirəcək və birgə layihələrin həyata keçirilməsinə kömək edəcək", - Hacılı bildirib.
Eyni zamanda, "Ticarət və İnvestisiya Evi" pavilyonlarında Ümumdünya Ticarət Təşkilatı (WTO) ilə birgə "yaşıl" maliyyə və ticarət, davamlı sənaye istehsalı, karbonun azaldılması və digər əlaqədar mövzulara həsr olunmuş tədbirlər təşkil olunacaq.
"'Yaşıl' texnologiyalara keçid, davamlı təchizat zəncirləri və iqlimə davamlı biznes modelləri yalnız etik bir imperativ deyil, eyni zamanda. uzunmüddətli iqtisadi artımın açar faktorudur", - deyə Hacılı vurğulayıb.
Onun sözlərinə görə, AZPROMO-nun birbaşa xarici investisiyaların təşviqi və ixracın dəstəklənməsi rolu bu qlobal tendensiyalarla əlaqəlidir.
"Hazırda Azərbaycanın bərpa olunan enerji sektorunda xarici investisiyalar külək və günəş enerjisi istehsalını inkişaf etdirir, Azərbaycanı ekoloji cəhətdən təmiz enerji istehsalı sahəsində regional liderə çevirir", - AZPROMO-nun nümayəndəsi bildirib.
Onun fikrincə, bu gün biznes qlobal davamlı inkişaf səylərinin təşviqində fəal rol oynamalıdır.
"Hökumətlər və beynəlxalq təşkilatlar iqlim dəyişikliyi probleminin həllinə daha çox diqqət yetirərkən, müəssisələr fəaliyyətlərini davamlı inkişaf məqsədləri ilə uyğunlaşdırmalıdır. Bu, dövri iqtisadiyyat üsullarının tətbiqi, karbon qazı emissiyalarının azaldılması və davamlı gələcək üçün innovasiyaların tətbiqini əhatə edir. Bu şəkildə, iqtisadi artım və ətraf mühitin qorunması arasında birgə inkişaf etdirilən bir dünya yaradılacaq", - deyə o vurğulayıb.
