Bakı, 19 sentyabr, AZƏRTAC
Xəzər dənizində suyun səviyyəsinin enməsi nəticəsində qədim yaşayış yeri qalıqlarının, maddi-mədəniyyət nümunələrinin görünməsi ilə əlaqədar Mədəniyyət Nazirliyinin və “Azərbaycan Xəzər Dəniz Gəmiçiliyi” QSC-nin dəstəyi ilə AMEA Arxeologiya və Antropologiya İnstitutunun Xəzər arxeologiyası ekspedisiyası 17 gün ərzində Abşeron yarımadasının Xəzər rayonu ərazisinə düşən Zirə və Pirallahı istiqamətində orta əsrlərə aid tarixi Şəhri-Gürganda arxeoloji kəşfiyyat işləri aparıb.
İnstitutdan AZƏRTAC-a bildirilib ki, tarix üzrə fəlsəfə doktoru İdris Əliyevin, sualtı arxeoloq, dalğıc Ceyhun Əliyevin və digər elmi əməkdaşların üzvü olduğu ekspedisiyaya Xəzər arxeologiyası şöbəsinin müdiri professor Abbas Seyidov rəhbərlik edib. Kəşfiyyat tədqiqatları uğurlu olub. Buradan XIX əsrə aid iki batmış gəminin qalıqları, orta əsrlərə aid saxsı məmulatları aşkar olunub. Gələcəkdə bu ərazilərdə daha geniş arxeoloji tədqiqat işlərinin aparılması nəzərdə tutulur.
Qeyd edək ki, AMEA Rəyasət Heyətinin 2023-cü il 12 iyul tarixli qərarı ilə Arxeologiya və Antropologiya İnstitutunun strukturunda qismən dəyişiklik edilərək daxili imkanlar hesabına və mövcud ştat vahidləri çərçivəsində Xəzər arxeologiyası şöbəsi yaradılıb. Şöbənin əsas tədqiqat istiqaməti Xəzər dənizinin Azərbaycan sektorunda dənizin dibini və sahilboyu əraziləri elmi-tədqiqat baxımından araşdırmaq, dəniz sahili zonalarda əvvəldən koordinatları məlum olan arxeoloji abidələrdə tədqiqatlar aparmaq, yeni abidələri qeydə almaq və tədqiq etmək, monitorinqlər həyata keçirmək, abidələrin memarlıq quruluşunu öyrənmək və planının tərtibatı kimi işlərdən ibarətdir.
