Baş nazir milli təhlükəsizliyə diqqət yetirmək və vətəndaşların və əsgərlərin rifahını birinci yerə qoymaq əvəzinə, müdafiə nazirini vəzifədən azad etməyi və döyüşün ortasında yeni təyinat mərhələsinə başlamağı seçdi. Bunların hamısı biabırçı siyasi ehtiyacları ödəmək üçündür.
Senzor.az-ın yerli KİV-ə istinadən məlumatına görə, bunları “İsrail Bizim Evimizdir” partiyasının sədri Aviqdor Liberman müdafiə naziri Yoav Qallantın vəzifədən azad olunmasına münasibət bildirərkən deyib.
“Əgər müdafiə naziri fəal döyüşlər zamanı dəyişdirilə bilərsə, o zaman öz vəzifəsini yerinə yetirə bilməyən və ölkənin təhlükəsizliyinə etinasız yanaşan Baş nazir mütləq dəyişdirilə bilər və buna görə dövlət təhqiqat komissiyası yaradılmalıdır”, - deyə A.Liberman vurğulayıb.
Müxalifət lideri Yair Lapid isə məsələyə bu cür reaksiya verib: “Müharibənin ortasında Qallantın işdən çıxarılması dəlilik aktıdır. Netanyahu siyasi baxımdan sağ qalmaq üçün İsrailin təhlükəsizliyini və İsrail ordusunun əsgərlərini qurban verir. Bütün sionist vətənpərvərləri etiraz əlaməti olaraq bu gecə küçələrə çıxmağa çağırıram”.
Demokratlar Partiyasının rəhbəri Yair Qolan da “küçələrə çıxın” deyə, tərəfdarlarını etiraz aksiyalarına çağırıb.
Girovların Qaytarılması üzrə Ailə Qərargahı müdafiə naziri Qallantın işdən çıxarılmasından dərin narahatlığını bildirib və bunu “girovlarla bağlı razılaşmanı sabotaj etmək səylərinin birbaşa davamı” adlandırıb.
Qeyd edək ki, bu gün axşam saatlarında Baş nazir Benyamin Netanyahu Yoav Qallantı müdafiə naziri vəzifəsindən azad edib və XİN başçısı İsrail Katzı onun yerinə təyin edib.
**
İsraildə Yoav Qallantın vəzifədən azad edilməsinə etiraz olaraq aksiyalar başlayıb.
