BMT Komitəsi itkin düşmüş şəxslərlə bağlı Azərbaycanın təklif etdiyi qətnaməni qəbul edib.
Xarici İşlər Nazirliyinin məlumatına görə, sənəd həmmüəllif kimi ona qoşulan BMT-yə üzv 56 dövlətin dəstəyini qazanıb.
Qətnamədə vurğulanır ki, silahlı münaqişələr nəticəsində insanların yoxa çıxması ailələrə ağır əzablar verir və münaqişələrə son qoymaq səylərinə mənfi təsir göstərir. İtkin düşmüş şəxslərlə bağlı beynəlxalq humanitar və insan hüquqlarının pozulmasına görə cəzasızlıqla mübarizə aparılmasının vacibliyinə xüsusi diqqət yetirilir.
Sənəddə həmçinin silahlı münaqişə tərəflərini insanların itkin düşməsinin qarşısını almaq, onların itkin düşmə şəraiti ilə bağlı lazımi araşdırmalar aparmaq və onların taleyini müəyyən etmək üçün bütün zəruri tədbirləri görməyə çağırır.
Azərbaycan Xarici İşlər Nazirliyi qeyd edib ki, qətnamənin qəbulu itkin düşmüş şəxslər probleminin əhəmiyyətini əks etdirir və beynəlxalq ictimaiyyəti onun həlli üçün fəal fəaliyyət göstərməyə çağırır.
Almaz Həsənli
