Rusiyanın xarici işlər naziri Sergey Lavrov Ukrayna Silahlı Qüvvələrinin Amerikanın ATACMS raketləri ilə Bryansk bölgəsinə zərbələr endirməsini Qərbin müharibənin eskalasiyasını istədiyinin siqnalı adlandırıb.
Yeniavaz.com xəbər verir ki, bu barədə o, G20 sammitinin keçirildiyi Rio-de-Janeyroda mətbuat konfransında bildirib.
Lavrovun sözlərinə görə, o, Kiyevin Co Bayden administrasiyasından Rusiya ərazisinə uzaqmənzilli raketləri vurmaq üçün artıq icazə alıb-almadığını təsdiqləyə bilmir:
“Təsdiq edə bilmərəm, hamı elə yazır ki, sanki həll olunmuş məsələdir. Hətta Borrell bunun rəsmi olduğunu deyib,  avropalılar isə bunu müzakirə edib, lakin qərara gəliblər ki, ukraynalılara uzaqmənzilli silahlarından istifadə etməyə icazə verib-verməməyə hamı özü qərar verəcək”.
O əlavə edib ki, ATACMS raketləri noyabrın 18-nə keçən gecə Bryansk vilayətinə edilən hücumlar zamanı dəfələrlə istifadə edilib:
“Bu, əlbəttə ki, onların eskalasiyanı artırmaq istədikləri siqnalıdır. Bu yüksək texnologiyalı raketlərdən amerikalılarsız istifadə etmək mümkün deyil, Putin bunu dəfələrlə deyib. Və indi müzakirə etdikləri bu 300 kilometrə qədər məsafə təsdiq olunarsa, mövqeyimizin necə dəyişəcəyi ilə bağlı xəbərdarlıq edilib. Amma əslində bu, Ukraynanın uzaqmənzilli raketlərdən istifadəsinə razılıq deyil, bu anonslardır”.