"Qazprombank"ın saytında yalnız "Mir" ödəniş sistemi kartları rəsmiləşdirilmək üçün əlçatan qalıb, "UnionPay" təklifi isə saytdan çıxarılıb. 21 noyabr tarixində ABŞ bankı sanksiyalar siyahısına daxil etsə də, bank Rusiyada xidmətlərin adi rejimdə davam etdiyini bildirib.
Valyuta.Az Rusiya mediasına istinadən xəbər verir ki,, "Qazprombank"ın saytında "UnionPay" ödəniş sistemi kartlarının rəsmiləşdirilməsi ilə bağlı təklif silinib. İndi axtarış sistemlərində bu təklif “arxiv kartlar” qeydi ilə görünür. Saytda yalnız "Mir" ödəniş sisteminin debet kartlarının rəsmiləşdirilməsi mümkündür.
⇒ "UnionPay" kartlarının fəaliyyəti dayanıb
"ТАСС" agentliyinin məlumatına əsasən, "Qazprombank" tərəfindən verilmiş "UnionPay" kartları artıq Vyetnam, Qətər, Qazaxıstan, Almaniya, Macarıstan, Tayland, BƏƏ və Türkiyədə işləməyib. Ukraynada hərbi əməliyyatların başlaması və sanksiyaların tətbiqindən sonra "Qazprombank" xaricdə istifadə oluna bilən "UnionPay" kartlarını təklif edən azsaylı Rusiya banklarından biri idi.
⇒ ABŞ-ın yeni sanksiyaları
21 noyabr 2024-cü ildə ABŞ Rusiya maliyyə sektoruna qarşı sanksiyalar tətbiq edib və "Qazprombank"ı xüsusi təyinatlı şəxslər siyahısına (SDN) daxil edib. Bu sanksiyalar ABŞ ərazisində bankın aktivlərinin dondurulmasını və amerikalıların onunla hər hansı əməliyyat aparmasının qadağan olunmasını nəzərdə tutur. Buna baxmayaraq, bank Rusiyada xidmətlərin, o cümlədən xarici ödəniş sistemləri kartlarının normal rejimdə fəaliyyətini davam etdirdiyini bəyan edib.
Sonradan bank, "UnionPay" kartlarının xaricdə istifadəsində mümkün problemlər barədə müştəriləri xəbərdar edib və bu kartların sahiblərinə xaricdə nağd pul istifadəsini tövsiyə edib.
⇒ "Qazprombank"ın rolu və valyuta əməliyyatları
Mərkəzi Bank "Qazprombank"ı sistem əhəmiyyətli kredit təşkilatları siyahısına daxil edib. 2022-ci ilin mart ayında Rusiya prezidenti Vladimir Putin dost olmayan ölkələrdən olan idxalatçılara "Qazprombank"da qaz tədarükünün ödənişi üçün xüsusi rubl və valyuta hesabları açmağı tapşırıb. Bank valyutanı Moskva birjasında sataraq əldə edilən rublu müvafiq hesaba qaytarırdı.
2024-cü ilin iyun ayında Moskva birjası ABŞ-ın sanksiyalarına məruz qalıb. Bu səbəbdən dollar və avro ticarəti dayandırılıb. Mərkəzi Bank idxalatçıları valyutanı "Qazprombank" vasitəsilə konvertasiya etməyə məcbur edib.
⇒ Digər bankların "UnionPay" kartlarının problemləri
ABŞ sanksiyalarına məruz qalmış digər Rusiya banklarının da "UnionPay" kartları xaricdə fəaliyyətini dayandırıb. Bunlara "T-bank", "MTS Bank", "Primorye Bank", "Sankt-Peterburq Bankı" və başqaları daxildir.
⇒ Rusiyanın sanksiyalara reaksiyası
Rusiya Qərb ölkələrinin tətbiq etdiyi sanksiyaları qeyri-legitim hesab edir və onların ləğvini tələb edir. Kremlin bəyanatına görə, "Qazprombank"ın məhdudiyyətlərinə baxmayaraq, qaz ixracının ödənişi üçün alternativ üsullar tapılacaq.
Rəhim
